Zemaj: Nuk ka ankesa për laboratorët privatë që po kryejnë testime për COVID-19

Ministri i Shëndetësisë Armend Zemaj ka thënë se deri tani nuk ka ankesa në lidhje me laboratorët privatë, të cilët janë licencuar për të kryer testime për COVID-19.

Në një konferencë për media gjatë vizitës në Prizren Zemaj tha se ka angazhuar inspektorë, të cilët do të kontrollojnë punën e këtyre laboratorëve.

“Kam angazhuar Inspektoratin Shëndetësor dhe IKSHPK-në që të aktivizojnë potencialin e tyre në kontrollin e këtyre laboratorëve, nga informacionet dhe raportet zyrtare deri më tani nuk ka ndonjë vërejtje për cilësinë e këtyre laboratorëve që japin këto shërbime, ndërsa nevoja për testime është duke vazhduar dhe jemi në procedura në zgjerimin e testimeve në 6 rajonet, si në laboratorë molekularë, ashtu edhe në laboratorët serologjikë”, ka thënë Zemaj, transmeton “Zeri.info”.

Deri tani në Kosovë janë licencuar vetëm dy laboratorë për teste PCR dhe dhjetëra të tjerë për testime serologjike. /Zëri