MI u bën thirrje mërgimtarëve për kujdes në komunikacion

Ministri i Infrastrukturës Pal Lekaj u ka bërë thirrje gjithë mërgimtarëve për kujdes të shtuar në komunikacion. Ai ka kërkuar nga mërgimtarët që të kenë kujdes dhe ta përshtatin shpejtësinë më rrugët në të cilat kalojnë, transmeton “Zëri.info”.

LEXO EDHE: Ky është mërgimtari nga Gjermania që vdiq në aksidentin e mbrëmshëm në Çallapek

Ky është njoftimi i plotë i Lekajt:

Thirrje për kujdes gjatë lëvizjes në komunikacion!

Bashkëqytetarë që jetoni e veproni në diasporë. Kosova, e veçanërisht familjet e juaja janë në pritje dhe të gëzuar që ju i vizitoni për festat e fundvitit.

Rrugët në Kosovë, shumë nga ato janë të ndërtuara, të sinjalizuara dhe të kalueshme. Mirëpo prapë kjo nuk nënkupton që duhet të rrezikoni veten dhe të tjerët në komunikacion, duke vozitur shpejtë, sidomos tani kur jemi në stinën e ftohtë të dimrit, sepse shpejtësia dhe mospërshtatja me kushtet në rrugë po dalin të jenë faktorët kryesorë të aksidenteve, disa nga të cilat edhe me fatalitet, siç ndodhi edhe në aksidentin e fundit, ku humbi jetën një qytetarë, duke e lënë familjen në pikëllim të përjetshëm.

Ne si Ministri, do të vazhdojmë që të bëjmë çdo gjë që është në dorën tonë, që të kemi rrugë të ndërtuara, të sinjalizuara dhe të mirëmbajtura mirë.

Duke ju thënë, ejani në vendlindje, të gëzohemi bashkë, në të njëjtën kohë ju bëjmë apel që të respektoni rregullat e komunikacionit sepse familja ju pret! /ZËRI