Rrëfehet Ismet Begolli
FC Prishtina ishte nën presion goxha të madh publik pas humbjes prej 5:0 në ndeshjen e parë kualifikuese të Europa Leagues nga Norrkopingu. Pavarësisht humbjes nga një kundërshtar shumë i fortë, për tifozët rezultati ishte mjaft zhgënjyes. Bardhekaltrit humbën edhe në ndeshjen kthyese nga 13 herë kampioni i Suedisë (0:1). Dhe, këto humbje duket se alarmuan klubin bardh e kaltër, i cili menjëherë filloi ndryshimet dhe reformimin e skuadrës. Bardhekaltrit larguan gjashtë lojtarë: Liridon Lecin, Shend Kelmendin, Endrit Krasniqin, Mërgim Nezirin, Gentrit Begollin, Genc Hamitin, e më herët edhe Liridon Kukajn.
Këto largime klubi nisi t’i zëvendësojë me disa ardhje tjera të reja, emra të njohur e me përvojë, si Drashko Bozhoviç (Rudari – Mali i Zi), Abdul Bashiru (FC Dremas – Gana) dhe Mentor Mazrekaj e Labinot Ibrahimi (Partizani), ndërsa janë paralajmëruar edhe ardhje tjera të reja.
Dhe, këto ndryshime kanë ngjall pakënaqësi brenda kryesisë së klubit. Me to nuk është pajtuar nënkryetari, Ismet Begolli, i cili dha dorëheqje. Në një prononcim për “Zërin”, Begolli e ka treguar arsyen e largimit të tij. “Unë jam larguar nga posti i nënkryetarit, jo nga klubi, sepse kam aksione në klub. Por, jam larguar vetëm nga pozita që mbaja sepse nuk jam pajtuar me këto politika. Mospajtimet janë diçka normale, ata që po i bëjnë këto politika mendojnë se janë të qëlluara, kurse unë mendoj se nuk janë të duhura. Pra, nuk kemi të bëjmë me çështje personale ose ‘dikush kundër dikujt’”, ka thënë Begolli, i cili qe shumë vite është aksionar në FC Prishtinë.
Në mesin e futbollistëve të larguar së fundmi është edhe djali i tij, Gentrit Begolli. Ndërsa, para një viti nga FC Prishtina u pat larguar edhe djali tjetër i Ismet Begollit, Granit Begolli. Fjala është për dy futbollistë që kanë kaluar pjesën më të madhe të karrierës në FC Prishtinë, ku edhe kanë dhënë kontribut të çmueshëm, për çka edhe vet klubi u pati thënë lamtumirë duke u shprehur mirënjohje.
Por, Ismet Begolli zotohet se dorëheqja e tij nuk është shkas e djemve të tij, siç thonë shumë të tjerë në komentet online nëpër rrjetet sociale.
Sidoqoftë, Begolli uron që këto politika që po i ndjek klubi t’i sjellin FC Prishtinës trofe, ani pse tash për tash personalisht ai nuk pretë aspak rezultate të tilla, për çka thotë se edhe u largua. “Unë kam qejf ta shoh Prishtinën sa më mirë. Njerëzit shkojnë e vijnë, kurse klubi do të mbetet”, përfundoi ai.
Begolli pritet edhe t'i shesë aksionet e tij, gjë që e ka paralajmëruar vet ai.
