Gashi: Strategjia e Kulturës të përfshijë konsultime të të gjithë akterëve

Ministri i Kulturës, Rinisë dhe Sportit, Kujtim Gashi, ka takuar Grupin Punues për Strategjinë e Kulturës, që do të jetë një dokument i ri strategjik gjithëpërfshirës për këtë fushë.

Në Grupin Punues të përpilimit të këtij dokumenti strategjik për fushën e kulturës do të ketë të përfshirë përfaqësues të organizatave qendrore të kulturës, të nivelit lokal, ekspertë të fushës dhe nga shoqëria civile. Gjithashtu, në faza të ndryshme të procesit, do të konsultohen edhe ekspertë ndërkombëtarë.

Ministri Gashi ia ofroi përkrahjen e plotë të MKRS-së Grupit Punues. Gjatë këtij takimi Gashi u shpreh se strategjia, e cila do të hartohet, të jetë dokument që orienton për vlera të mirëfillta krijuese e kulturore, me objektiva të arritshme dhe të qarta. “Kultura është një fushë e gjerë dhe ka rëndësinë e pazëvendësueshme në shoqëri. Si Ministri do të kemi kujdes të veçantë dhe do të përpiqemi që buxheti për kulturë të rritet edhe më shumë, sepse përmes fushës së kulturës mbahet lart shpresa në shoqëri dhe krijohet një imazh edhe për Kosovën brenda dhe jashtë saj”, është shprehur mes të tjerash ministri Gashi.