Ndriçim Ademaj prezanton romanin "Pa heronj, pa bujë"
Sonte (8 qershor), me fillim nga ora 19.00, në mjediset e kafe-librarisë Dit' e Nat' në Prishtinë, do të promovohet romani "Pa heronj, pa bujë" i autorit Ndriçim Ademaj. Me ndërhyrjen e shkrimtarit dhe studiuesit Adil Olluri. "Pa heronj, pa bujë" është botuar nga Shtëpia Botuese “Pegi”.
Ky libër rrëfen një histori që përshkon dy kohë, dy vende, dy përjetime të ndryshme në dukje të huaja për njëra-tjetrën. Heroi ynë lëkundet mes një dashurie të pavetëdijshme për Sarën dhe kujtimeve gjysmë të trishta - gjysmë gazmore të fëmijërisë së tij në Kosovë. Mes dy anëve të medaljes, ai ndihet i përhumbur rrugëve të Zvicrës në kërkim të një identiteti, që nuk mund të hiqet e të vishet si një gunë e errët dimri, por që të qëndron pranë, në anë, në brinjë, si një kone e vogël e ledhatuese, e me raste, shndërrohet në një bishë të pakontrollueshme.
Shkrimtari Ndriçim Ademaj ka të botuar edhe librat me poezi “Kërkoj diellin”, “Dera” dhe “Këngë nga Rruga e Farkëtarëve”. Me vargjet e tij ai është prezantuar shpeshherë edhe jashtë Kosovës, në vendet e Ballkanit, në Francë dhe në Zvicër.
