Lumezi: Kryetarja e Gjykatës në Prishtinë, nuk është në listën e veteranëve mashtrues

Kryeprokurori i Shtetit, Aleksandër Lumezi ka folur rreth lajmit se edhe kryetarja e Gjykatës Themelore të Prishtinës, Afërdita Bytyqi, është në listën e veteranëve të rrejshëm.

I pyetur se a është, siç është raportuar në media, kryetarja e Gjykatës Themelore të Prishtinës pjesë e aktakuzës që u ngrit së fundmi lidhur me listën e veteranëve të rrejshëm, kryeprokurori Lumezi ka thënë se kryegjyqtarja e Prishtinës nuk është në këtë aktakuzë.

LEXO EDHE: "Isha pjesëtare e UÇK-së, do të deklarohem për këtë çështje sapo të kthehem në Kosovë"

“Kryetarja e Gjykatës Themelore të Prishtinës, Afërdita Bytyqi, nuk është në listën e Prokurorisë së përfituesve të kundërligjshëm”, tha Kryeprokurori i Shtetit, Aleksandër Lumezi, për Kallxo.com.

Sot gjatë ditës, kryetarja e Gjykatës së Prishtinës, Afërdita Bytyqi ka komentuar lidhur me veprimtarinë e saj në luftën e fundit në Kosovë.

Ajo tha se asnjëherë nuk ka përfituar asgjë nga statusi i veteranes së luftës megjithëse ka kontribuar.