Kryeministrja serbe flet për ndarjen e Kosovës, i përgjigjet edhe Daçiqit
Kryeministrja e Serbisë, Ana Bërnabiq, ka thënë sot se Qeveria që ajo udhëheq nuk ka ende pozicion zyrtar në çështjen e Kosovës.
Sipas Bërnabiq, një zgjidhje kompromisi me Kosovën ende nuk është afër për tu arritur me Kosovën, dhe për të njëjtën është duke u punuar në vazhdimësi.
“Vuçiq është duke bërë më të mirën për të arritur një zgjidhje kompromisi, unë nuk mendoj që ajo është afër për tu arritur, mirëpo ne po e kërkojmë atë në çdo qoshte, në mënyrë që të humbin sa më pak dhe të marrim sa më shumë”, ka thënë Bërnabiq.
LEXO EDHE: ‘‘Kjo është e vetmja gjë që do të përfshihet në korrigjimin e kufijve me Serbinë’’
Bërnabiq komentoi edhe deklaratat e ministrit të Jashtëm serb, Ivica Daçiq për ndarje të Kosovës, për të cilat tha se janë qëndrime individuale dhe se nuk përfaqësojnë pozicionimin zyrtar të Qeverisë serbe.
“Edhe nëse është një i ashtuquajtur Asociacion Plus, ose nëse s’ka fare kompromis, ne do të presim deri të marrim kontrollin total mbi pjesën jugore, edhe nëse është reale ose jo, ose ndarje, secili ka të drejtë të japë opinionin e vet”, ka thënë Bërnabiq.
Megjithatë, ajo shtoi se nuk e di nëse një kompromis do të arrihet deri në fund të këtij viti, pasi që sipas saj një gjë e tillë varet edhe nga udhëheqësit në Prishtinë, dhe dëshira e tyre për arritjen e kësaj marrëveshjeje.
Ndryshe, presidenti serb Aleksander Vuçiq ka thënë sot se zgjidhja me Kosovën, sipas të gjitha gjasave do të jetë e dhimbshme për Serbinë, e megjithatë ai thotë se një e tillë duhet të arrihet sa më shpejtë që të jetë e mundur.
