Ahmeti paralajmëron lokacionin për shtatoren e Anton Çettës

Kryetari i Komunës së Prishtinës, Shpend Ahmeti ka paralajmëruar se shumë shpejtë Komuna e Prishtinës do të dalë me propozime për lokacionet për shtatoren e Anton Çettës, veprimtarit dhe pajtuesit të gjaqeve, transmeton "Zëri.info". 

Instituti Albanologjik nuk e ka lejuar shtatoren në oborr me arsyetimin se hapësira e këtij institucioni nuk është vend adekuat për shtatoren e Anton Çettës.

“Anton Çetta është një prej figurave më frymëzuese dhe emancipuese në Kosovë e më gjerë. Si i tillë, diskutimi për shtatoren duhet të jetë i kufizuar vetëm në gjetjen e vendit më të dinjitetshëm, jo vetëm si respekt për veprën, por edhe si shpërndarje e frymës së emancipimit, mobilizimit dhe ballafaqimit me problemet shoqërore në Kosovë që ka frymëzuar Çetta”, ka shkruar Ahmeti në Facebook.

Shpend Ahmeti po ashtu përmes këtij postimi ka lajmëruar se gjatë javëve në vijim do të shkurtojnë dhe propozojnë lokacionet për shtatoren. /Zëri