Banorët e Fortesës flasin për ‘Zërin’, tregojnë si e dëbuan 'hoxhën' nga fshati

I vetëquajturi hoxhë i fshatit Fortesë ish-Bellacerkë e Rahovecit, Bedri Bytyçi, pas thirrjeve skandaloze ndaj të ndjerit Hilmi Haradinaj, është përzënë nga ky fshat.

Lajmin se ai nuk është pjesë e Bashkësisë Islame, e ka konfirmuar edhe vet kryeimami i Kosovës, Sabri Bajgora.

Mirëpo, për “Zeri.info”, ka folur Begzad Gashi, banor i fshatit Fortesë.

Ai ka thënë se jemi mbledhur të gjithë banorët e fshatit dhe kemi kërkuar që ky hoxhë të largohet nga fshati, për shkak siç deklaroi ai, deklarata e tij është fyese dhe mund të nxiste përçarje.

Ai thotë se menjëherë pasi që e ka postuar Bytyçi statusin e tij në rrjetin social, së bashku me banorët e tjerë kanë shkuar në shtëpinë e tij, por që ai e kishte mbyllur derën dhe nuk u është përgjigjur thirrjeve të banorëve, raporton “Zeri.info”

“E lexova statusin edhe menjëherë jam nis tek shtëpi a tij. Unë shkova në shtëpi ai e kishte mbyllur derën dhe nuk u përgjigj thirrjeve që i bëmë”, ka deklaruar Gashi për “Zeri.info”.

Tutje ai ka thënë se për shkak të frikës se mund të eskaloj situata dhe mund të nxiste përçarje, banorët e këtij fshati vendosën që atë ta dëbojnë nga fshati.

“U mblodhëm të me të gjithë bashkëfshatarët dhe kërkuam që këtë hoxhë ta dëbojmë nga fshati. Fshati është shumë hetoregjen, mirëpo kurrë s’kemi pasur probleme të tilla në këtë pjesë. Edhe kemi pas frikë se mos kjo deklaratë e tij do të mund të kishte ndikim negativ, do të mund të ndezte përçarje”, ka deklaruar Gashi për “Zeri.info”.

Ndërkaq, Partia Fjala, pjesë e së cilës është Bytyçi, është distancuar nga deklarata e tij, duke cilësuar se një deklaratë e tillë e ish-kandidatit të tyre për Komunë të Malishevës, është e ngutshme dhe jo e duhur, madje nuk përkon me frymën e subjektit të tyre politik, raporton “Zeri.info”.

“Ne FJALA distancohemi nga deklarata e Bedri Bytyçit lidhur me vdekjen e Hilmi Haradinajt, babait të Kryeministrit të Kosovës. Ne cilësojmë se një deklaratë e tillë ka qenë e ngutshme dhe jo e duhur. Deklarata e tillë nuk përkon me frymën e subjektit tonë politik. Ne respektojmë çdo qytetar të Republikës Kosovës, e në veçanti Hilmi Haradinajn i cili ka rritur dhe edukuar dëshmorët Shkelzen e Luan Haradinaj. Ne i shprehim ngushëllimet më të sinqerta Kryeministrit Haradinaj, familjes Haradinaj dhe gjithë qytetarëve të Republikës Kosovës”, thuhet në reagimin e partisë Fjala. /ZËRI/