LDK nuk i frikësohet zgjedhjeve

Nënkryetari i LDK-së Lutfi Haziri shprehet kundër prishjes së kalendarit zgjedhor, por thotë se partia e tij nuk u frikësohet zgjedhjeve të parakohshme edhe nëse kërkohet që ato të mbahen “nesër”. Madje në intervistën dhënën “Zërit” ai shprehet optimist se LDK-ja do të dalë partia e parë në zgjedhjet e ardhshme. Haziri thotë se do t’i kthehet LDK-së, por nuk do të rikandidojë për kryetar të Gjilanit

Nënkryetari i Lidhjes Demokratike të Kosovës, njëherësh kryetar i Komunës së Gjilanit, Lutfi Haziri, është shprehur i bindur se LDK-ja do të rikthehet fuqishëm në zgjedhjet e ardhshme. Ai në intervistën dhënë gazetës “Zëri” ka vlerësuar se partia e tij do të dalë e para, po qe se mbahen zgjedhjet e parakohshme, edhe pse ai thotë se nuk ka arsye për ta ndërruar kalendarin e zgjedhjeve.

“Hipotetikisht nëse ju më pyetët, përgjigjja ime është që LDK-ja nesër është e gatshme të hyjë në zgjedhje dhe të ballafaqohet me këtë platformë politike”, ka deklaruar ai. I pari i Gjilanit më tutje ka thënë se përfundimisht nuk do të rikandidojë për kryetar të Gjilanit, e po ashtu thotë se nuk ka ambicie për kryetar të Lidhjes Demokratike e as të ekzekutivit kosovar.

Nënkryetari i LDK-së ka theksuar se raportet mes koalicionit qeverisës janë mjaft stabile, ndërsa veprimin e fundit të kryeparlamentarit Veseli (që t’ua ndajë nga 100 mijë euro lojtarëve të Përfaqësueses së Kosovë nëse kualifikohen), i ka cilësuar si veprim për t’i motivuar futbollistët e assesi tendencë për t’ia marrë kompetencat kryeministrit Isa Mustafa. Haziri në vazhdim ka folur edhe për Gjykatën Speciale e për arrestimin e komandantit të Mitrovicës, Nehat Thaçit, me ç’rast ka vlerësuar se veprimi i Serbisë ndaj këtij të fundit është tipik për serbët.

Zëri: Kohët e fundit kryeparlamentari Kadri Veseli është kritikuar se ka marrë rolin e kryeministrit, si i vlerësoni ju veprimet e tij të fundit?

Haziri: Në fakt unë më shumë i kam parë si veprime motivuese të kryeparlamentarit ndaj reprezentacionit të Kosovës ose angazhime konkrete që ndikojnë në përmirësimin e ambientit në përgjithësi. Nuk ka të bëjë me tendencë të ushtrimit të detyrës së kryeministrit dhe nuk e shoh si tendencë të tillë në asnjë mënyrë. Realisht, më shumë janë angazhime, si në rastin e fundit, motivuese për reprezentacionin e Kosovës sesa tendencë  për ta marrë rolin e kryeministrit. Kryeministri e ushtron detyrën e vet pa asnjë lloj ndërhyrjeje, pa asnjë lloj ndikimi nga askush. 

Zëri: Disa deputetë të LDK-së po thonë se partia juaj ka nevojë për prurje të reja,  sa është e nevojshme një gjë e tillë sipas jush?

Lutfi Haziri: Gjithkund, edhe në rastin tonë, edhe në rastin e LDK-së, së pari duhet ruajtur, strukturuar, por të ndërtohet kjo që është. Dhe në fund, të respektohen vendimet e saj, të respektohet edhe përgjegjësia programore, edhe vendimet e organeve të LDK-së dhe natyrisht çdo proces zgjedhor edhe i brendshëm, qoftë i LDK-së, qoftë për zgjedhje sipas Kushtetutës, ka nevojë për prurje të reja. Ka nevojë për emra të rinj, ka nevojë për hapje më të madhe, sidomos ndaj grupmoshave të reja dhe autoriteteve që mund të ndikojnë drejtpërdrejt.
Është proces i natyrshëm, ndërsa tendenca për t’i eliminuar, larguar dhe sakatuar grupmoshat e vjetra apo grupet e militantëve apo grupet e atyre që i kanë dhënë LDK-së këto 26 vjet frymë dhe zhvillim, në emër të prurjeve të reja është pak demagogji.

Zëri: A mendoni që brenda LDK-së ka të atillë që duan t’i largojnë këto figurat e “grupmoshave të vjetra”?

Haziri: Unë nuk e thashë atë, as nuk e kualifikova ashtu, po vetëm e konstatova një fakt sepse nga ajo nëpër të cilën po kalon sot jeta politike në Kosovë gjithçka që kuptohet në emër të prurjeve të reja mendohet dhe besohet që është dikush i cili po pengon këto prurje të reja. Në fakt nuk ekziston, LDK-ja nuk e ka këtë problem. LDK-ja është më e avancuar në këtë plan, më e avancuar se të gjitha partitë politike sepse ka vendosur mandate, standarde zgjedhore, dialogim të brendshëm dhe natyrisht ne i kemi pasur telashet tona, problemet tona gjatë vitit 2006-2007, kur ndodhi ndarja e dhimbshme. Ndarja e dhimbshme e LDK-së është diçka që LDK-ja duhet ta përballojë ose ta tejkalojë që të rikthehet partia e parë në Kosovë.

Zëri: Keni deklaruar se nuk do të kandidoni për kryeministër, por për kryetar të LDK-së, a e keni ndërmend të kandidoni në të ardhmen?

Haziri: Përderisa jam i zgjedhur me 60 për qind të votave në qytetin ku punoj dhe jetoj, unë mendoj që kjo është detyra ime kryesore karshi jetës politike në Kosovë. Definitivisht, unë i kthehem LDK-së. Jam nënkryetar i LDK-së dhe kryetar i Degës në Gjilan. Do të vazhdoj t’i ruaj këto dy angazhime politike dhe do të vazhdoj të punoj që LDK-ja të kthehet partia e parë në Kosovë. Kurrfarë ambicie të tjera nuk kam, as kurrfarë propozime të tjera nuk kam pasur.

Zëri: A do të rikandidoni atëherë për kryetar të Gjilanit?

Haziri: Në asnjë mënyrë nuk planifikoj që të rikandidoj për kryetar të Gjilanit. Por kjo çështje u mbetet në fund qytetarëve të Gjilanit dhe strukturave të LDK-së, por nëse unë pyetem, sigurisht që mendoj se me mandatin e tretë përfundon edhe premtimi im edhe besimi im, edhe gjithë ajo që unë jam i lidhur me Gjilanin.

Zëri: Kohët e fundit ka pasur disa deklarata kundërthënëse në mes koalicionit PDK - LDK, a mund të na thoni si janë raportet brenda koalicionit?

Haziri: Definitivisht raportet janë korrekte. LDK-ja ka ndërtuar raporte pune me PDK-në në kuadër të një programi qeverisës, i cili është dakorduar dhe mbi të cilin kemi marrëveshje politike për qeverisjen e vendit me pozitën e kryeministrit, që LDK-ja duhet të udhëheqë.
Ndërsa, në të njëjtën kohë ne me PDK-në jemi rivalët më të mëdhenj dhe rivalët kryesorë politikë në Kosovë. Këtë diversitet politik nuk e kemi armiqësi, definitivisht. Çfarë ka pasur situata pas luftës deri te një periudhë jashtëzakonisht shumë. Kjo lloj armiqësie tashmë nuk ekziston dhe diversiteti politik në demokraci është i natyrshëm dhe në interes të shtetit kemi punuar bashkë. Por, gjithmonë në skenën politike do ta ruajmë këtë rivalitet dhe dallimet tona politike do të mbesin gjithmonë si dallime politike.

Zëri: Është folur shpeshherë për zgjedhje të parakohshme, a duhet të ketë zgjedhje sipas jush?

Haziri: Nuk pres që të ketë zgjedhje të parakohshme. Kalendari zgjedhor është i konfirmuar në Kosovë. Unë mendoj që më e rëndësishme është rishikimi i kodit zgjedhor. Edhe Ligji për Zgjedhjet Parlamentare, edhe Ligji për Zgjedhjet Lokale është emergjente që të paraqitet para partive politike. Nuk ka nevojë të pritet më, sidomos për zgjedhjet lokale, por edhe për ato parlamentare.
Duhet të standardizohet dhe të hulumtohet një sistem zgjedhor që është funksional edhe për nivel qendror, edhe për nivel lokal dhe i cili është i besueshëm dhe më i lehtë për vetë qytetarët e Kosovës.
Deri më tash përfundimisht prej vitit 2008 po bëhen 8 vjet edhe disa palë zgjedhje që ky sistem zgjedhor nuk ka garantuar korrektësi dhe nuk garanton asnjëherë rezultat të qëndrueshëm zgjedhor.

Zëri: Hipotetikisht, po që se shkohet në zgjedhje të parakohshme, a është LDK-ja e gatshme dhe a mund t’i fitojë zgjedhjet kur është thënë se partia juaj do të humbë më së shumti nga kjo gjë?

Haziri: Këto janë paragjykime dhe këto dëshira të rivalëve tanë nuk do të kenë mundësi t’i realizojnë asnjëherë. Ne besojmë shumë se po vjen koha e rikthimit të LDK-së. Hipotetikisht nëse ju më pyetët, përgjigjja ime hipotetike është që LDK-ja nesër është e gatshme të hyjë në zgjedhje dhe të ballafaqohet me këtë platformë politike. Asnjë dyshim dhe asnjë mundësi nuk do të ketë që LDK-ja të jetë e papërgatitur. Ne jemi parti politike, e ndërtuar në platformën nacionale dhe kjo platformë jona nacionale i ka mbërritur objektivat kryesorë, sa i përket lirisë, pavarësisë së Kosovës. Ne do të jemi gardianë të zhvillimit të Kosovës. Por, ne detyrën tonë nuk e kemi përfunduar.

Zëri: Pas zgjedhjeve, a duhet të ketë LDK-ja vijë të kuqe për ndonjë parti?

Haziri: Ky sistem zgjedhor detyrimisht me vendim gjykate apo pa vendim gjykate, me rezultat qytetar do të çojë në koalicione. Sistemi zgjedhor është ai i cili dikton këtë formulë qeverisëse. Atëherë, thirrja ime që të rishikohet Ligji për Zgjedhjet Parlamentare dhe për Zgjedhjet Lokale e ka këtë kuptim: që le të krijohet një ligj, i besueshëm për qytetarët, i lehtë për t’u votuar dhe i lehtë në kuptimin e zbatimit të detyrës qytetare. Krijimi i një ambienti të tillë përmes një riformimi të Ligjit për Zgjedhje Nacionale dhe Lokale do të ndikonte shumë për të qenë të besueshëm dhe ai që i fiton zgjedhjet vendos për mënyrën e qeverisjes së vendit dhe për partnerin qeverisës në vend.

Zëri: Qeveria ka kërkuar dialog me opozitën, por nuk i ka bërë asaj ndonjë ftesë zyrtare, a po e zvarrit ajo me qëllim këtë punë?

Haziri: Qeveria është në situatë jashtëzakonisht të kërkuar politikisht për ta mbajtur dialogun dhe për ta shtrirë konsensusin sepse demarkacioni po na çon në një kusht që qytetarët e Kosovës të mos kenë të drejtë të lëvizin lirshëm në Evropë. Dhe këtë penallti dhe këtë dënim shqiptarët e Kosovës nuk e kanë merituar sepse kur flasim për serbët e disa të tjerë ata kanë pasaporta që u lejohet lirshëm të lëvizin nëpër Evropë. Vetëm shqiptarët e Kosovës janë të kufizuar. Mendoj që kryeministri sikur ajrin që ka nevojë ta ketë për çdo ditë ka nevojë që të ulet me opozitën dhe ta shtrijë konsensusin për qartësimin e procesit të demarkacionit. Kështu që në çdo kohë kryeministri 24 orë në 7 ditë është i gatshëm që të takohet dhe të bisedojë me përfaqësues të opozitës për këtë çështje. Ftesën kryeministri e ka bërë publike. Çdo ftesë publike është ftesë zyrtare.

Zëri: Është thënë se në fund të këtij viti, eventualisht në fillim të vitit që vjen, do të funkisonalizohet Gjykata Speciale, si e vlerësoni ju krijimin e saj?

Haziri: Le të konstatojmë që Kosova për herë të tretë pas 16 vjetësh po ballafaqohet me  kërkesën për gjykimin e krimit të luftës. Për herë të tretë këto 16 vjet për ne si popullatë është jashtëzakonisht e vështirë për ta shpjeguar sepse jemi ndodhur para kësaj situate. Por Gjykata Speciale, e cila është vendosur të jetë në një vend neutral dhe të jetë me gjyqtarë neutralë ndërkombëtarë, tregon qartë që ky proces nuk është mbyllur në Kosovë.  Mandati kur janë hetuar të gjitha vrasjet për motive politike është mandati që përfundimisht Gjykata e Kosovës në Hagë do të merret. Dështimi i administratës së Kombeve të Bashkuara dhe Tribunalit Ndërkombëtar për ish-Jugosllavi apo edhe i mandatit të EULEX-it ka bërë që të themelohet Gjykata e Kosovës në Hagë.

Zëri: Është thënë se do të përfshihen edhe persona nga politika, çka mendoni ju lidhur me këtë?

Haziri: Për mua është spekulative. Askush përveç prokurorit special nuk e di as kush është hetuar. Kështu që, deri në lëshimin e fletarrestimeve të para të gjithë është mirë të presim se me kë po merret: a janë të politikës, a jashtë politikës dhe a janë figura të larta apo figura të tjera. Ne besojmë në pastërtinë e misionit të luftës së UÇK-së. Gjithë ata që kanë abuzuar me ambientin dhe metodat e luftës natyrisht që drejtësia duhet t’i prekë.

Zëri: Para disa ditësh u arrestua komandanti i Policisë Rajonale të Mitrovicës Nehat Thaçi, a ka bërë Qeveria mjaftueshëm për lirimin e tij apo si do të duhej të veprohej më konkretisht?

Haziri: Është për keqardhje sjellja e Serbisë karshi nënkolonelit të Policisë së  Republikës së Kosovë. E ka zgjedhur një emër, si në këtë rast zotëri Nehat Thaçi, për ta arrestuar por sjellja e Serbisë është arrestimi i institucioneve të Kosovës. Kjo është sjellja e keqe e Serbisë karshi Kosovës. Qeveria e Kosovës ka ndërmarrë veprime përmes mekanizmave të saj, zyrës sonë në Beograd dhe zyrës sonë në Bruksel, edhe misionet e tjera ndërkombëtare për të ndikuar. Serbia vetëm mund të vonohet, por zotëri Nehat Thaçi do të lirohet nga burgu detyrimisht.

Zëri: Ministrja Edita Tahiri tha se ndërprerja e bisedimeve me Serbinë varet prej Qeverisë së Kosovës, a do të duhej të ndërpriteshin bisedimet?

Haziri: Është çështje që duhet të vlerësohet, por sjellja karshi këtij procesi, sjellja në moszbatimin e disa marrëveshjeve, mospajtimi rreth kodit telefonik dhe disa çështje që Serbia po mundohet t’i zvarrisë për shkaqe të konsumit të brendshëm politik bëjnë që Kosova në këso situata duhet detyrimisht të shohë sepse formati i bisedimeve nuk është duke dhënë rezultatet e pritura. Ndërsa, ka ardhur koha për ta rishikuar formatin e bisedimeve, të dialogut mes Kosovës dhe Serbisë.

Zëri: Pse po bëhen pra këto arrestime? A po do Serbia në njëfarë forme që ta vërë para aktit të kryer Kosovën për marrëveshjet në fjalë?

Haziri: Po kjo është sjellje tipike e serbëve, fatkeqësisht, sa herë që ofrohet ndonjë vendim i rëndësishëm, si javën e kaluar për t’u vendosur kodi telefonik. Mbajtja peng e kësaj çështjeje nganjëherë i çon në masa të tilla që të merren si me rastin e nënkolonelit Nehat Thaçi e të mos merren me çështjet që janë në tavolinë.

Zëri: Kohët e fundit është ngritur aktakuzë kundrejt jush, sa janë të vërteta ato për të cilat ngarkoheni?

Haziri: Është pretendim i prokurorit realisht. Nuk është në fazën e aktakuzës së konfirmuar aktualisht në asnjë mënyrë. Këto pretendime janë të paqëndrueshme, joligjore sepse denoncimi ka qenë politik nga Dega e PDK-së në Gjilan, sepse procesi si i tillë nuk ka qenë në dorë të kryetarit të Komunës, por ka qenë në duar të organeve të tjera. Sidoqoftë, unë pres që trupi gjykues ta zbardhë rastin dhe sido që të vendosë unë i përgjigjem.

Zëri: Z. Haziri, vendi qe disa muaj është në një krizë institucionale, si do të mundë të vihej deri te një zgjidhje?

Haziri: Unë do ta quaja tension institucional brenda Kuvendit të Republikës dhe jo në institucionet e tjera sepse ky tension ka ardhur si pasojë e dallimeve dhe ndërtimit të proceseve kundrejt Qeverisë për motiv të zgjedhjeve të parakohshme apo edhe motive të tjera politike. Unë mendoj që gjithë këtë tension duhet ta shtensionojmë deri në pikën zero dhe deputetët t’i kthehen Kuvendit, të diskutojnë, të votojnë për çështje që janë të zgjedhur ata. Dialogu është i vetmi mjet që mund t’i përafrojë.