Infektuar: 67906
Shëruar: 59174
Vdekur: 1587
Krasniqi: Procesi i numërimit të votave nga diaspora, shqetësues

Krasniqi: Procesi i numërimit të votave nga diaspora, shqetësues

Zgjedhjet 2021 February 22, 2021 - 13:48

Lirim Krasniqi, drejtor në organizatën “Germin”, e sheh shqetësues anulimin e disa votave nga diaspora, duke theksuar që krejt kjo është përgjegjësi dhe dështim i KQZ-së për të informuar votuesit nga jashtë, pasi shumë fletëvotime përmes postës janë refuzuar.

Sipas tij, arsyet e refuzimit të disa votave nga diaspora janë të ndryshme.

Ai ka thënë se parregullsitë janë shfaqur edhe gjatë regjistrimit të votueseve.

“Ne jemi duke vëzhguar vazhdimisht gjithë procesin e votimit nga jashtë dhe kemi filluar qysh nga periudha e regjistrimit, i kemi përcjellë të gjitha parregullsitë dhe i kemi adresuar të gjitha problemet në Komisionin Qendror të Zgjedhjeve dhe institucioneve të tjera relevante dhe tash jemi duke vëzhguar procesin e verifikimit të pakove me fletëvotime nga diaspora, ku deri më tani kemi pasur një numër relativisht të lartë të refuzimeve, arsyet për këtë janë të ndryshme dhe fillojnë qysh nga mosqenia në listën e votuesve nga jashtë ose për faktin që një pjesë e atyre që i kanë dërguar fletëvotimet përmes postës janë refuzuar në periudhën e regjistrimit dhe kjo ka shkaktuar që një pjesë e madhe e zarfeve me fletëvotime të mos pranohen”, tha Krasniqi.

“Kjo pa dyshim është shqetësuese, për shkak se tregon që votuesit nuk kanë qenë të informuar sa u përket procedurave të votimit nga jashtë dhe është edhe përgjegjësi e KQZ-së për shkak se kanë dështuar të informojnë votuesit nga jashtë dhe edukojnë ata për procedurat e votimit dhe si rezultat kemi një numër shumë të lartë të refuzuarve, të cilët i kanë dërguar fletëvotimet përmes postës”. u shpreh ai për EO-në.

Ai mes të tjerash tha që ky proces po zgjat mjaftueshëm dhe krejt kjo si pasojë e mungesës së planifikimit nga ana e KQZ-së.

Madje thotë që do të kalojë edhe një javë tjetër me këtë proces të verifikimit të votave nga diaspora.

“Po, faktikisht arsyeja pse po zgjat procesi sipas vlerësimit tonë është mungesa e planifikimit nga ana e KQZ-së. Kjo mungesë e planifikimit është parë qysh në periudhën e regjistrimit, kur ata kanë marrë një vendim për t’i telefonuar aplikuesit, vendim të cilin nuk kanë arritur ta zbatojnë deri në fund dhe janë detyruar që prapë ta anulojnë. Edhe tash po vërejmë edhe te votat e diasporës, sepse sa më shumë vonohet certifikimi i rezultateve, aq me pa integritet është i gjithë procesi i zgjedhjeve pastaj”, deklaroi ai.

Nga shërbimi votues nga 19 mijë pako të vlerësuara deri më tani janë aprovuar mbi 22 mijë zarfe, të refuzuara janë pjesa tjetër dhe të proceduara janë mbi 31 zarfe nga 19 mijë pako. Krasniqi tha që nuk po mbrohen votat nga diaspora, madje pret që disa çështje të rishqyrtohen para se të fillojë procesi i numërimit, nga to edhe pranimin e dokumenteve te Kosovës, të cilave u ka skaduar afati.