Bytyçi
Memorial në Prishtinë për të gjithë Jasharajt e flijuar me 5, 6 dhe 7 mars ‘98
Kosova dhe Prishtina si kryeqytet i saj duhet ta ketë monumentin e familjes heroike Jashari të Prekazit. Pra, monumenti që do të përfshinte mes tjerash edhe shtatoret, përveç që do të prezantonte figurën e komandantit legjendar të UÇK-së, Adem Jashari, duhet të jetë një monument gjithëpërfshirës, ku duhet të prezantohet flijimi i të gjithë familjarëve të komandantit legjendar, anëtarë tjerë të familjes Jashari dhe bashkëluftëtarëve tjerë të rënë në Epopenë e UÇK-së më 5, 6 dhe 7 mars 1998 në Prekaz.
Madhështia e Epopesë së Jasharajve qëndron pikërisht në faktin se në këtë epope kanë rënë heroikisht tri gjenerata të familjes së komandantit Adem Jashari: ka rënë heroikisht komandanti, vëllai i tij, babai e nëna, fëmijët e tij e të vëllezërve te tij, daja, kanë rënë prindërit e luftëtarëve të orëve të para të UÇK-së, Musa e Sahit Jashari, dhe bashkëluftëtarët tjerë të Prekazit e të Drenicës. Prandaj, duhet të ketë monument të të gjithë Jasharajve të flijuar për lirinë e Kosovës. Ky monument gjithëpërfshirës që prezanton sakrificën dhe flijimin e të gjithë Jasharajve të rënë në Epopenë e UÇK-së, e madhështon lavdinë e komandantit legjendar të UÇK-së, Adem Jashari.
Për të realizuar këtë monument të Epopesë së UÇK-së, të Epopesë së Jasharajve, duhet të ketë qasje të integruar ndërinstitucionale, ku duhet të përfshihen përmes një komision ndërinstitucional këto institucione:
- Qeveria e Kosovës (përmes Ministrisë së Kulturës dhe Ministrisë së Mjedisit, Planifikimit Hapësinor e Infrastrukturës)
- Kuvendi i Kosovës (përmes Agjencisë për Menaxhimin e Komplekseve Memoriale)
- Komuna e Prishtinës (përmes Drejtorisë së Kulturës, Drejtorisë së Planifikimit dhe asaj të Urbanizmit)
- Familja Jasharaj nga Prekazi
- Shoqatat e dala nga lufta;
Ky grup ndërinstitucional pas analizave dhe diskutimeve edhe me publikun, do të duhej të përzgjidhte një lokacion adekuat reprezentativ për projektimin dhe ndërtimin e Monumentit të Epopesë së UCë-se, pra Epopesë së Jasharajve të Prekazit, ku do të mund të prezantohej në mënyrë të dinjitetshme flijimi heroik i gjithë familjes Jashari.
Në këtë kuadër, grupi teknik profesional që do të duhej të rridhte nga komisioni ndërinstitucional do të angazhohej për përgatitjen e një detyre projektuese të mirëfilltë, që do t’i paraprinte shpalljes së një konkursi ndërkombëtar të arkitekturës.
Detyra projektuese do të duhej të paraqiste objektiva dhe parime bashkëkohore të arkitekturës, skulpturës, të artit e të arkitekturës së peisazhit, në mënyrë që monumenti i Jasharajve, i komandantit Adem Jashari, familjes dhe bashkëluftëtarëve të tij të rënë në mars të vitit 1998, të ketë identitet origjinal, të ketë përmbajtje, të ketë mesazh dhe të jetë ikonë - "landmark" arkitektonik i Prishtinës e i Kosovës.
Vetëm me këtë qasje serioze institucionale do të mund të inkurajonim pjesëmarrjen e mendjeve më të ndritura të arkitekturës dhe skulpturës botërore dhe vendore dhe në këtë mënyrë do të arrinim të realizonim një monument të denjë të lirisë së Kosovës, që do të prezantonte në mënyrën më të mirë sakrificën dhe flijimin unik të familjes Jashari të Prekazit për lirinë e Kosovës.
(Arianit Bytyçi, arkitekt)
Sqarim: Të gjitha opinionet në këtë rubrikë reflektojnë qëndrimet e autorit/autorëve e jo domosdoshmërisht të NGB “Zëri” SHPK
