“Nuk kisha oreks” - Ylli i Bayernit, Pavardi zbulon se luftoi me depresionin gjatë mbylljes nga COVID-19
Mbrojtësi i Bayern Munichut, Benjamin Pavard ka zbuluar se ai ka luftuar me depresionin gjatë mbylljes nga COVID-19.
Francezi ka folur për efektet e mbylljes nga COVID-19 në shëndetin e tij mendor.
Pavard pranon se ai luftoi duke u izoluar dhe nuk u hap për problemet e tij në atë kohë.
Bundesliga u ndërpre në mes të shkurtit 2020 dhe nuk rifilloi deri në maj, kur gara u kthye pa tifozë.
“Në kokën time gjërat nuk ishin në rregull. Në fillim thua se nuk është asgjë, se do të kalojë, por kur e sheh që vazhdon dhe më pas shkon në stërvitje dhe nuk ke buzëqeshje në fytyrë, duhet të reagosh”, tha ai për “Le Parisien”.
“Si gjithë të tjerët, edhe unë jam njeri, edhe nëse kam një shtëpi të bukur me palestër, më duhej kontakti njerëzor. U zgjova në mëngjes, nuk kisha oreks. Jam munduar të kujdesem për veten, të gatuaj, të shikoj seriale. Nuk më pëlqen fjala depresion, por ishte kaq. E fsheha nga të gjithë, por sot ndihem shumë më mirë. Unë dola nga e gjithë kjo një njeri më i mirë. Më ndryshoi”.
Pavard nuk është futbollisti i parë që flet hapur për depresionin dhe i është bashkuar një numri në rritje lojtarësh që kanë qenë të gatshëm të ndajnë përvojat e tyre.
Lojtarët si legjenda e Barcelonës, Andres Iniesta dhe mesfushori i Juventusit, Paul Pogba, kanë treguar më parë se si kanë luftuar me depresionin gjatë karrierës së tyre. /Zeri.info
