Liverpooli fiton thellë ndaj Southamptonit të Armando Brojës

Liverpooli fiton thellë ndaj Southamptonit të Armando Brojës

Sport November 27, 2021 - 17:54

Liverpooli ka fituar me rezultat të thellë 4-0 në shtëpi ndaj Southamptonit në ndeshjen e vlefshme për javën e 13-të në Ligën Premier.

Ekipi i Jurgen Klopp ka marrë fitoren e radhës në Ligën Premier, duke fituar pa vështirësi ndaj Southamtonit dhe duke i qëndruar si hije liderit Chelsea.

Pjesa e parë e ndeshjes u karakterizua me dominim të Reds, të cilët përveç rasteve të shumta shënuan edhe tri gola.

Reds hapen serinë e golave pas vetëm dy minutave me anë të Diogo Jota, i cili shënoi për 1-0, ndërsa i njëjti lojtar shënoi edhe në minutën e 32-të për 2-0.

Në minutën 37-të ishte Thiago Alcantara që shënoi për epërsinë 3-0 dhe me këtë rezultat ekipet shkuan në pushim.

Vlen të përmendet se në ketë pjesë, sulmuesi shqiptar, Armando Broja pati dy raste të mira, por pa arritur t’i konkretizojë.

Në pjesën e dytë, Liverpooli ishte përsëri skuadër më e mirë, e menaxhoi lojën dhe shënoi edhe një gol tjetër për të siguruar fitoren.

Goli i vetëm në këtë pjesë erdhi në minutën e 52-të dhe ishte Virgil Van Dijk, i cili shënoi një gol të bukur për rezultatin 4-0, që doli të ishte edhe përfundimtar.

Pas kësaj fitore, Reds e shohin veten në pozitën e dytë me 28 pikë apo një më pak se Chelsea i pari, ndërsa Southamptoni zë vendin e 14-të me 14 pikë.

Në ndeshjen e ardhshme, Liverpooli luan në udhëtim derbin ndaj Evertonit, teksa Southamptoni e pret Leicester Cityn