Jashari: Arbëria luajti më mirë dhe e meritoi fitoren sot
Arbëria e Dobrajës e ka nisur në mënyrën më të mirë të mundshme edicionin e ri në Superligën e Kosovës në futboll.
Skuadra nga Lipjani që ka debutuar këtë vit në elitën e futbollit kosovar, është përballur sot me Trepçën'89, raporton "Zeri.info".
Në ndeshjen e zhvilluar në stadiumin "Riza Lushta" në Mitrovicë, Arbëria e Dobrajës ka fituar me rezultat të pastër, 0:2.
Pas ndeshjes, mesfushori i 89-shit, Muharrem Jashari ka thënë se mysafirët nga Lipjani e merituan fitoren sot.
“Mendoj që ishte paraqitje zhgënjyese nga ana jonë. Arbëria luajti më mirë dhe e meritoi fitoren sot”, u shpreh Jashari për "ArtSport", përcjell "Zeri.info".
“Gjithsesi, edhe ne i patëm disa mundësi për të shënuar dhe për të ndryshuar takimin, por nuk ia dolëm”, nënvizoi mesfushori. /Zeri.info