Zyrtare: Besnik Krasniqi rikthehet në shtëpi, nënshkruan për FC Prishtinën

Zyrtare: Besnik Krasniqi rikthehet në shtëpi, nënshkruan për FC Prishtinën

Sport August 08, 2020 - 19:03

FC Prishtina e ka prezantuar transferimin e mbrojtësit nga kryeqyteti, Besnik Krasniqi.

Krasniqi i cili ishte pjesë e Ballkanit në dy edicionet e fundit, është prurja më e re te skuadra e Armend Dallkut, raporton "Zeri.info".

Lajmi është konfirmuar nga vetë faqja zyrtare e FC Prishtinës.

Njoftimi i plotë i FC Prishtinës:

"Besniku kthehet në shtëpi

Krasniqi është fëmijë i Prishtinës

Prishtinë, 8 gusht 2020 – Pas shtatë vitesh, 30 vjeçari, Besnik Krasniqi sërish kthehet në shtëpi.

Fëmija i Prishtinës i cili me bardhekaltrit për pesë vite, nga edicioni 2008 – 2013, kishte fituar gjithçka me Prishtinën, të gjitha! Tre tituj kampioni, një kupë dhe dy superkupa duke u paraqitur në 137 ndeshje zyrtare dhe duke shënuar 16 gola, sidomos edicioni i fundit më 2012/13 ishte i jashtëzakonshëm, golashënuesi i dytë i skuadrës me 14 gola dhe “kurora e dyfishtë”, e vetmja në histori të klubit.

Pas kësaj, Besniku ka vazhduar karrierën në Partizan të Tiranës (2013/14), Teutë të Durrësit (2014), Istog (2015), Gjilan (2015), Flamurtar i Vlorës (2016), Feronikel (2016/17), Llap (2017), Vëllaznim (2018) dhe në dy edicionet e fundit ishte pjesë e skuadrës së Ballkanit.

“Nga sot jam kthyer në klubin ku u rrita dhe fillova karrierën profesionale. Iu premtoj të gjithëve që do të jap më të mirën nga vetja për klubin e qytetit tim”, ka thënë Besnik Krasniqi pas nënshkrimit të kontratës dyvjeçare.

Krasniqi iu është bashkuar skuadrës në Istog ku është edhe duke e mbajtur fazën përgatitore". /Zeri.info