Infektuar: 4715
Shëruar: 2227
Vdekur: 101
Më 16 qershor shorti për kualifikimet e “Euro 2022”

Më 16 qershor shorti për kualifikimet e “Euro 2022”

Sport June 02, 2020 - 22:10
Lajmet e fundit nga sporti

Më 16 qershor Përfaqësuesja e Kosovës në hendboll do të mësojë kundërshtarët e fazës së fundit të kualifikimeve për “Euro 2022”.

Për shkak të ngritjes që ka bërë në vitet e fundit, Përfaqësuesja jonë fillon prej fazës së dytë kualifikuese, përkatësisht prej kualifikimeve të rregullta. Tashmë janë zhvilluar dy raunde kualifikimesh (faza e parë kualifikuese dhe raundi eliminues), por pa Kosovën pjesë të tyre.

Kjo është bërë e mundur falë rezultateve pozitive në vitet e fundit. Në fazën e fundit kualifikuese do të garojnë 32 shtete që do të ndahen në tetë grupe.

Kosova do të synojë hapin e ardhshëm, përkatësisht kualifikimin historik në kampionat evropian. Kualifikimi arrihet duke u renditur në njërën nga dy vendet e para në grup, por është i mundur edhe prej pozitës së tretë në grup. Shumë varet nga shorti që do të tërhiqet më 16 qershor nga ora 17:00.

Direkt në Evropian kualifikohen Hungaria e Sllovakia si nikoqire e po ashtu Spanja si fituese e Euro 2020 dhe Kroacia si nënkampione. Përmes kualifikimeve do të caktohen 20 kombëtaret tjera pjesëmarrëse. Ndeshjet e para do të luhen më 4 e 5 nëntor të këtij viti, kurse menjëherë më 7 e 8 nëntor janë ndeshjet e dyta. Ndeshjet tjera luhen vitin e ardhshëm, deri në fillim të majit.

Në short Kosova do të jetë në vazon e katërt së bashku me Finlandën, Italinë, Turqinë, Izraelin, Estoninë, Greqinë dhe Ishujt Faroe. Në vazon e parë janë Norvegjia, Suedia, Danimarka, Gjermania, Franca, Sllovenia, Çekia dhe Islanda. Në vazon e dytë janë Austria, Bjellorusia, Portugalia, Maqedonia e Veriut, Serbia, Rusia, Mali i Zi, Holanda.

Zvicra, Lituania, Rumania, Bosnjë-Hercegovina, Ukraina, Letonia, Polonia e Belgjika janë në vazon e tretë për shortin e 16 qershorit./Zëri