Kosova kthehet me tri kupa nga gara e madhe në Buzet

Kosova kthehet me tri kupa nga gara e madhe në Buzet

Sport September 15, 2019 - 23:35
Detajet

Automobilistët kosovarë kanë pasur paraqitje mjaft të mirë në garën që u zhvillua në Buzet të Kroacisë dhe që ishte e vlefshme për Kampionatin Evropian.

Bardhyl Canolli, Besfort Bunjaku dhe Gazmend Demolli janë kthyer me kupa nga kjo aventurë, pasi të tre janë renditur në pozitën e tretë në klasat përkatëse.

Bardhyl Canolli para nisjes ishte shprehur mjaft i matur.

“Buzeti është garë e madhe, me automobilistë të jashtëzakonshëm nga shumë vende të Evropës. Në një konkurrencë të tillë nuk është e lehtë të gjendesh në podiumin e fituesve, por për fat të mirë ne e arritëm këtë qëllim dhe shpresoj që edhe në të ardhmen ta prezantojmë Kosovën me shumë sukses”, ka thënë Canolli, i cili u rendit i treti në klasën e tij, por fitoi kupë edhe si i dyti në konkurrencën nën 3000 ccm.

Besfort Bunjaku është shprehur i kënaqur me rezultatin e arritur, e njëkohësisht edhe falënderues ndaj atyre që e kanë ndihmuar.

“Edhe pse konkurrenca ishte shumë e fortë, ndërsa unë për herë të parë garova në këtë shteg, pra kisha vështirësi ta njihja shtegun, ia dola të renditem në pozitën e tretë në Klasën 2000 ccm, Grupi A që gjithsesi është një rezultat i mirë. Falënderoj të gjithë ata që më kanë përkrahur për të arritur deri këtu”, ka thënë Bunjaku pas garës, i cili edhe para nisjes për në Buzet ishte shprehur optimist se do të gjendet në podium.

I treti është renditur edhe Gazmend Demolli, i cili garoi në klasën mbi 3000 ccm, Grupi N.

“Ishte kënaqësi të marrë pjesë në një garë kaq prestigjioze. E kemi ditur se do të jetë konkurrencë e fortë, por po ashtu kemi besuar se mund të arrijmë rezultate të mira dhe ashtu edhe doli. Mendoj se këto rezultate janë tregues i mirë që automobilizmi i Kosovës ka përparur shumë“, është shprehur Demolli.

Rezultatet mund të ishin edhe shumë më të mira, sikur Liridon Kalenderi të mos kishte aksident. Në provat zyrtare të së shtunës, ai ishte bindshëm i pari, por fatkeqësisht të dielën nuk arriti ta përfundojë garën.