Holanda e shkëlqyer, Kroacia fiton me përmbysje, Belgjika kryen detyrën
Holanda ka regjistruar fitore 4:0 Bjellorusinë duke marrë kryesimin e grupit C të eliminatoreve për “Euro 2020”.
Memphis Depay në minutën e parë të ndeshjes kaloi në epërsi ‘Tulipanët’.
Me këtë gol, ai u bë lojtari më i ri (25 vjeç e 36 ditë) që arrin në kuotën e 14 golave me Kombëtaren holandeze që prej Patrick Kluivert në vitin 1999 (22 vjeç e 339 ditë), shkruan Zëri.
Gini Wijnaldum dyfishoi rezultatin përpara se Depay të shënonte të tretin nga pika e bardhë e penalltisë.
Ai është kthyer në një lojtar kyç te Holanda që është ringjallur pas mospjesëmarrjes në Kupën e Botës.
Në fund, ishte gjiganti i Liverpoolit, Virgil Van Dijk ai që shënoi golin e katërt.
Ndeshja e ardhshme e "Tulipanëve" do të jetë të dielën kundër Kombëtares së Gjermanisë.
Në ndeshjen tjetër të këtij grupi, Irlanda e Veriut ka mposhtur 2:0 Estoninë.
Në Grupin I, të përbërë nga gjashtë ekipe, Belgjika ka fituar ndaj Rusisë me rezultatin 3:1.
Ishin Tielmans dhe Hazard (2) që shënuan për vendasit, ndërsa Cheryshev golin e vetëm të rusëve.
Në dy ndeshjet e tjera, Qipro ka fituar 5:0 ndaj San Marinos, ndërsa Skocia është mposhtur 3:0 në fushën e Kazakistanit.
Maqedonia e Veriut ka fituar 3:1 ndaj Letonisë duke marrë kryesimin e Grupit G.
Polonia ka fituar 1:0 ndaj Austrisë jashtë fushe falë golit të Piatek në pjesën e dytë, ndërsa Izraeli ka barazuar 1:1 ndaj Sllovenisë.
Në ndeshjet e Grupit E, Kroacia nënkampione e botës ka marrë një fitore të vuajtur 2:1 në shtëpi kundër Azerbajxhanit.
Miqtë kanë kaluar në avantazh me Sheydaev (19'), por vendasit kanë përmbysur me Barasic (44') dhe Kramaric (79').
Vendi i parë në këtë grup mbahet nga Sllovakia, që ka fituar 2:0 ndaj Hungarisë./Zëri/