Rrëfimi i Canës: Wenger më kërkoi te Arsenali, ja pse dështoi transferimi
Kapiteni legjendar i Kombëtares shqiptare, Lorik Cana ishte i ftuar special mbrëmje e ndërrimit të viteve në emisionin “Mos i fol babagjyshit” në “Ora News”.
Në prononcimin e tij, veç të tjerave ka treguar edhe për interesimin e Arsenalit si dhe për miqësinë me Ronaldinhon.
“Bëmë një turne në Zvicër dhe mes këtyre skuadrash ishte dhe Arsenali, PSG-ja dhe disa skuadra të tjera. Më erdhi ftesa nga Arsenali për të bërë një provë, konkretisht nga Arsene Wengeri. Isha akoma 16-vjeç dhe më kujtohet që u bëmë të gjithë gati. Ishte një mundësi e artë. Shkuam drejt ambasadës për të marrë vizën. E shikoja si mundësinë e fundit për të pasur një karrierë futbolli, sepse kishim marrë shkresën që do të riktheheshim në Kosovë. Kur nuk ma dhanë vizën ishte shumë e rëndë. Sikur të mbyllet një derë”, tha ai.
“Unë në moshën 18-vjeçare kam filluar të stërvitem me ekipin e parë të PSG-së. Në atë kohë Parisi kishte yje botërore. Një nga këta ishte dhe Ronaldinho. Sapo kishte fituar kampionatin Botëror. Më kujtohet herën e parë, kur shkova në stërvitje, i tregova dhe emrin tim. Nuk e mbajti mend dhe më thërriste Sedrik. Më vonë, e kuptova që kisha fituar besimin e tyre, kur Ronaldiho filloi të ma thërriste saktë emrin tim. Ishte një eksperiencë e jashtëzakonshme”, u shpreh Cana.
