Haradinaj: Kosova krenare me vajzat dhe djemtë që përmes sportit po e lartësojnë vendin
Kosova është krenare me vajzat dhe djemtë e saj, të cilët përmes sportit, më së miri po e përfaqësojnë vendin tonë në arenën ndërkombëtare.
Kështu tha kryeministri, Ramush Haradinaj, gjatë takimit me Klubin e Hendbollit të Femrave-Istogu, i kryesuar nga trajneri Faruk Shala.
Me këtë rast, Haradinaj përgëzoi hendbollistet e Istogut për arritjet e tyre në të tetën e finales së “Challenge Cup”, duke u renditur në mesin e 16 ekipeve më të mira të Evropës.
“Sportistët kulmorë që i ka Kosova, duhet të jenë motiv dhe shembull për gjeneratat e reja, por edhe për Hendbollistet e Klubit “Istogu” për pjesëmarrje në garat ndërkombëtare”, tha kryeministri Haradinaj, duke theksuar se është për keqardhje që Klubi i Hendbollit të Femrave- Istogu nuk gëzon kushte të mira për t’i zhvilluar aktivitetet e tyre.
Haradinaj tha se Qeveria e Kosovës do të jetë mbështetësja kryesore e gjithë sportistëve kosovarë, të cilët me arritjet e tyre po bëjnë histori nëpër botë në gara të rëndësishme sportive.
Ndërkaq, trajneri i Klubit të Hendbollit të Femrave-Istogu, Faruk Shala, pasi falënderoi kryeministrin Haradinaj për pritje, e njoftoi atë me kërkesat që i ka Klubi Hendbollistik i Femrave “Istogu”, me theks të veçantë mungesën e një palestre, si dhe mbështetjen financiare për trajtime mjekësore, që janë baza kryesore e zhvillimit të aktiviteteve të tyre.
