Aksidenti i rëndë i Miss Xhamajkës, u rrëzua gjatë provave dhe pësoi lëndime
Pak para finales së Miss Universe 2025, konkursi u trondit nga një ngjarje dramatike. Miss Xhamajka, dr. Gabrielle Henry, pësoi një aksident të rëndë gjatë provave paraprake më 19 nëntor në Tajlandë, duke rënë nga skena dhe duke u lënduar seriozisht.
Sipas njoftimit zyrtar nga kompania organizuese, konkurrentja ka pësuar hemorragji intrakraniale, ndër lëndime të tjera, dhe ndodhet në gjendje kritike.
Momenti i aksidentit u filmua nga kamerat dhe brenda pak minutash Dr. Henry u transportua me urgjencë në një spital në Bangkok, ku u vendos në njësinë e kujdesit intensiv. Ajo vazhdon të monitorohet 24 orë nga ekipi mjekësor, ndërsa organizatorët kanë deklaruar se do të mbulojnë plotësisht të gjitha shpenzimet e trajtimit dhe shtrimit të saj.
Ngjarja ka hedhur një hije të rëndë mbi konkursin, i cili këtë vit është shoqëruar me tensione dhe incidente të tjera. Para kurorëzimit të Miss Meksikës, Fátima Bosch, si Miss Universe 2025, ndodhi një tjetër episod i pakëndshëm: një nga organizatorët kryesorë, tajlandezi Nawat Itsaragrisil, e ofendoi publikisht Bosch duke e quajtur “budallaqe” gjatë një takimi me konkurrentet më 4 nëntor. Ky veprim shkaktoi reagim të menjëhershëm, duke e detyruar Miss Meksikën dhe disa prej pjesëmarrëseve të largoheshin në shenjë solidariteti. Pas kritikave të shumta, Itsaragrisil kërkoi falje, por u largua nga detyrat e tij për konkursin e 74-të.
Me dy episode të rënda brenda pak ditësh, Miss Universe 2025 po përballet me tensione të forta dhe kritika të ashpra, ndërsa publiku pret me ankth lajme të reja për gjendjen e dr. Gabrielle Henry.
