Dua Lipa dhe Laura Harrier shkëlqejnë në tapetin e kuq

Dua Lipa, këngëtarja shqiptare me famë botërore, në moshën 30-vjeçare vazhdon të dëshmojë se është një ikonë e padiskutueshme e stilit.

Në daljen e saj të fundit, ajo mahniti publikun me një veshje të zezë të hijshme, të zbukuruar me detaje të sofistikuara. Fustani me korse nudo vinte në pah linjat e saj trupore të tonifikuara, duke e bërë pamjen edhe më të guximshme.

Ajo e kompletoi stilin me stoli luksoze të markës Bvlgari dhe këpucë klasike të zeza, duke sjellë një kombinim perfekt të thjeshtësisë dhe luksit. Flokët e lëshuara natyrshëm dhe grimi i butë theksuan më tej elegancën e saj.

Në anën tjetër, aktorja amerikane Laura Harrier, 35 vjeçe, zgjodhi një qasje krejt ndryshe: një fustan të shkurtër transparent që linte pak vend për imagjinatë. Veshja e saj u shoqërua me taka të larta dhe një çantë të vogël, duke e kthyer në një pamje sensuale dhe moderne.

Dy yjet e ekranit, megjithëse me stile krejt të kundërta, arritën të tërheqin vëmendjen e kamerave dhe të mediave, duke sjellë një duel të vërtetë mode mbi tapetin e kuq. Kritikat e para të revistave të huaja të modës i cilësuan pamjet e tyre si një kombinim i “elegancës klasike” dhe “modernitetit të guximshëm”.

Ky event edhe njëherë e dëshmoi se Dua Lipa mbetet ndër ikonat më të mëdha të modës ndërkombëtare, ndërsa Laura Harrier vazhdon të eksperimentojë me stile që nuk kalojnë pa u vënë re./kultplus