Dua Lipa fiton dy çmimet e mëdha në “Brit Awards”
Mbrëmjen e djeshme u zhvillua ceremonia e ndarjes së çmimeve “Brit Awards.”
Këngëtarja me origjinë shqiptare, Dua Lipa ishte nominuar në tre kategori dhe prej tyre arriti të rrëmbente çmimet “Këngëtarja më e mirë” dhe “Albumi më i mirë” për albumin e saj “Future Nostalgia”.
Dua u shpreh shumë e lumtur për çmimet e fituara dhe falenderoi të gjithë bashkëpunëtorët e saj teksa u ngjit në skenë për të marrë kupën e saj të fitores.
“Dua t'i them faleminderit çdokujt sepse ky album më ka mësuar shumë, më ka dhënë besim, fuqi dhe kurajo. Më ka dhënë shumë dashuri dhe miqësi dhe jam shumë mirënjohëse për të gjithë njerëzit që krijuan këtë album”, u shpreh Dua pasi fitoi çmimin “Albumi më i mirë”, shkruan Ora News.
Gjithashtu këngëtarja shkëlqeu me pamjen e saj në tapetin e kuq. Dua kishte veshur një fustan të verdhë me pika të zeza, që mbrapa kishte një bisht të gjatë, fustanin e kishte kombinuar me një palë taka të larta në ngjyrë lejla dhe poshtë kishte veshur geta të zeza të shkurtra.
