Zbulohet në Turqi një statujë e rrallë e Atenës nga epoka e Augustit
Një statujë prej mermeri të bardhë, rreth 2 metra e lartë, është zbuluar gjatë gërmimeve arkeologjike në qytetin antik Laodicea, pranë Denizli-t, në Turqi.
Sipas arkeologëve, statuja i përket periudhës së perandorit August (27 p.e.s. – 14 e.s.) dhe paraqet hyjneshën Atena. E gjetur pa kokë (acefale), ajo ruan megjithatë një element të veçantë ikonografik: figurën e Meduzës në kraharor, pjesë e aegis-it karakteristik të Atenës.
Statuja u zbulua e shtrirë me fytyrë poshtë, brenda mbushjes me rrënoja të murit të jashtëm të ndërtesës së skenës së teatrit, në zonën e njohur si postskene. Pavarësisht mungesës së kokës, trupi prej mermeri paraqitet në gjendje të shkëlqyer ruajtjeje.
Ministri turk i Kulturës dhe Turizmit, Mehmet Nuri Ersoy, u shpreh se zbulimi dëshmon rolin e rëndësishëm të këtij kompleksi si qendër e jetës kulturore në antikitet, duke theksuar angazhimin për ruajtjen dhe promovimin e trashëgimisë së pasur historike të vendit.
Analiza stilistike e vendos veprën në stilin e parë klasik të epokës augustiane, të dallueshëm për palosjet natyraliste të veshjeve dhe mjeshtërinë në përpunimin e mermerit. Hyjnesha paraqitet mbi një bazë rrethore, e veshur me një peplos pa mëngë dhe një mantel të mbështjellë rreth qafës, një tipologji e rrallë që rrit vlerën shkencore të zbulimit. Në pjesën e pasme, statuja është lënë e papërfunduar, pasi ishte menduar të vendosej mes kolonave arkitektonike, duke përqëndruar detajimin në pjesën ballore.
Ndërtesa e skenës së teatrit perëndimor të qytetit daton në shekullin II p.e.s. dhe kishte një strukturë madhështore me tre kate, ku çdo nivel përmbante nga 16 kolona. Hapësirat ndërmjet tyre shërbenin si galeri për skulptura hyjnish dhe skena mitologjike.
Këto kompozime shpesh pasqyronin episode nga epikat e Homerit, përfshirë udhëtimin e Odiseut. Gërmimet e viteve të fundit kanë zbuluar gjithashtu figura që përfaqësojnë përbindëshin detar Skylla dhe shpellën e gjigantit Polifemi.
Zbulimi i kësaj statuje përforcon dëshmitë për ndikimin e thellë të kulturës greko-romake në rajon dhe rëndësinë e artit skulpturor në hapësirat publike të qyteteve antike.
