Përfundon me sukses nata e dytë dhe përmbyllëse e festivalit “Shqip Up Comedy” - edicioni i katërt
Mbrëmja e dytë dhe njëkohësisht përmbyllëse e “Zurich Shqip Up Comedy Festival” ka shënuar një tjetër sukses të madh në qytetin e Cyrihut, duke i dhënë fund me plot të qeshura dhe emocione edicionit të katërt të këtij festivali tashmë tradicional të komedisë shqiptare në Zvicër.
Në sallën “Stadthalle Dietikon”, qindra artdashës shqiptarë u mblodhën edhe këtë herë për të shijuar performancat e humoristëve të njohur, të cilët sollën një atmosferë të ngrohtë dhe plot energji.
Pas një nate të parë të paharrueshme me T-Romino, Shpend Ahmetin, Valina Muçollin dhe Lulzim Buçollin, publiku u argëtua gjithashtu edhe në after party-n e veçantë me Edona Reshitajn & Band, që i dha ngjarjes një mbyllje festive.
Dy prezantuesit karizmatikë Ylber Bardhi dhe Adriana Matoshi e mbajtën publikun të përfshirë gjatë gjithë mbrëmjes, me humorin e tyre spontan dhe komunikimin plot gjallëri me audiencën.
Interesi për festivalin ka qenë i jashtëzakonshëm, duke e dëshmuar edhe njëherë se “Zurich Shqip Up Comedy Festival” është kthyer në një ngjarje kulturore të shumëpritur për komunitetin shqiptar në Zvicër — një hapësirë ku arti, humori dhe bashkimi kulturor i diasporës gjejnë shprehjen më të bukur.
Me përfundimin e këtij edicioni të katërt, organizatorët paralajmëruan se puna tashmë ka nisur për vitin e ardhshëm, me synimin që edicioni i pestë të sjellë edhe më shumë surpriza dhe artistë të rinj në skenën e humorit shqiptar.
