Hapet në Prishtinë festivali “Mirëdita, dobar dan”
Foto: REL

Hapet në Prishtinë festivali “Mirëdita, dobar dan”

Kultura October 14, 2021 - 20:48

Dokumentari i Danijella Shtajnfelldit “Zaceli me” (Më shëro), i cili flet për dhunën seksuale, hapi edicionin e tetë të Festivalit “Mirëdita, dobar dan”, të enjten mbrëma në Prishtinë.

Dokumentari përmban histori intime, dëshmi të të mbijetuarve të përdhunimit, por edhe të autorëve të dhunës seksuale.

Kjo është hera e parë që festivali “Mirëdita, dobar dan” mbahet me kapacitet të plotë në Prishtinë.

Ai organizohet nga OJQ Integra, Nisma Rinore për të Drejtat e Njeriut, Forumi ZFD, Festivali DAM dhe Iniciativat Qytetare, me mbështetjen e Fondacionit Kosovar për Shoqëri të Hapur.

Igor Gjuriq, nga Nisma Rinore për të Drejtat e Njeriut, tha se organizatorët po përpiqen të ngrenë çështje që u përkasin marrëdhënieve Kosovë-Serbi, serbëve dhe shqiptarëve, por në një mënyrë tjetër, “jo në atë mënyrë që e bëjnë politikanët”.

“Ky festival i ndihmon serbët dhe shqiptarët ta kuptojnë më mirë njëri-tjetrin”, tha ai.

Kushtrim Koliqi, nga Integra, tha se festivali “Mirëdita, dobar dan” është një nga nismat e pakta përmes së cilës bashkëpunojnë shqiptarët dhe serbët.

“Edhe këtë vit do të vazhdojmë t’i promovojmë vlerat e përbashkëta, pavarësisht nga narracioni negativ që ekziston në të dyja vendet”, tha ai, duke shtuar se ky festival është një simbol i unitetit dhe bashkimit të dy popujve.

Në kuadër të festivalit, i cili zgjat deri më 16 tetor, do të organizohen debate, promovime librash, koncert e të tjera.

Festivali mbahet qysh në vitin 2014, një herë në vit.

Qëllimi i festivalit është që takimet e komuniteteve kulturore të Kosovës dhe Serbisë të iniciojnë ndryshime dhe të krijojnë një traditë bashkëpunimi, e cila do të kontribuojë në normalizimin e përhershëm të marrëdhënieve midis Prishtinës dhe Beogradit.

Në festivalin në Prishtinë, publiku njihet me skenën kulturore të Serbisë, ndërsa publikut në Beograd i prezantohen artistë dhe interpretues që përfaqësojnë skenën kulturore të Kosovës.

Në vitet e mëparshme, ky festival në Beograd është shoqëruar me incidente që kanë shkaktuar grupet e krahut të djathtë./REL