Agushi letër të hapur Harvey Keitel: Mos luani në filmin për “Shtëpia e verdhë”, është puro propagandë serbe

Aktorja Aurita Agushi ka dërguar një letër publike aktorit me famë botërore, Harvey Keitel, ku i ka kërkuar që të mos jetë protagonist në filmin “Shtëpia e verdhë”.

Duke u bazuar në një raportim të televizionit publik, ku thuhej se aktori Keitel është angazhuar për të luajtur një film serb ku shqiparët prezentohen si terroristë dhe sipas raportit të eurodeputetit Dick Marty mbi të ashtuquajturen “Shtëpia e Verdhë” në Shqipëri, Agushi i ka kërkuar aktorit që të mos e pranoj një rol të tillë, pasi kështu do t’i lëndonte 13 mijë viktimat e luftës në Kosovë.

Më tej aktorja kosovare në letrën e saj përmend edhe intervenimin e NATO-së që erdhi pas gjenocidit serb mbi popullaten civile shqiptare.

Kjo është letra e plotë e Agushit:

I dashur Harvey Keitel, po dëgjoja lajmet e RTK-së sonte,  dhe emri yt u përmend për një angazhim të mundshëm tuajin në një film propagandues serb, për të ashtuquajturën shtëpi inegzistence  “Shtëpia e verdhë“, ku kinse shqiptarët kanë kryer krime mbi popullatën civile serbe.

Realiteti është krejt ndryshe i dashur Harvey. Populli shqiptar ka qenë viktimë e regjimit të Milloshevicit, i njohur edhe si Kasapi i Ballkanit . Unë e di që mua nuk më takon të të them se çfarë të luash e çfarë jo. Por tani bëhet fjalë për një puro propagandë të shtetit serb.

Shumë i dashur Harvey, une jam aktore vetë, dhe shpesh herë keni qenë inspirim për mua. Por ju lutem shumë mos e bëni një gjë të tillë, sepse do ta lëndonit një popull të tërë. Do ta lëndonit një popull i cili i rrezikohej nga spastrimi etnik. Ju lutem mos e bëni,  sepse do t’i lëndoni mbi 13.000 civilë shqiptar të vrarë, në mesin e tyre fëmijë , të rijnë , gra shtatzëna, dhe të moshuar . Do t’i lëndonit mbi 20.000 gra të dhunuara . Do t’i lëndonit 1653 familjet e personave të pagjetur që ende nuk e kanë një varr ku ti qajnë të afërmit e tyre . Gjatë gjithë luftës kam qenë në Kosovë, dhe e dini cila ka qenë frika ime më e madhe i dashur Harvey ?! Jo nga vdekja, sepse në luftë njeriu edhe mund të vritet, por frika ime më e madhe ka qenë se mund të dhunohem në sy të babait dhe vëllezërve të mi. Dhe për më tepër thurja plane në kokën time për një vdekje të shpejtë që një gjë e tillë mos të më ndodhte.

Ju kujtoj i dashur Harvey që NATO intervenoi në vitin 1999 që ta shpëtoj një popull nga spastrimi etnik , dhe që të mos përsëritej një Srebrenica e dytë . Andaj shumë i dashur Harvey të lutem mos e bëj, sepse nuk të bën aspak nderë një film propagandues i një regjimi që bëri tre lufta brenda 10 viteve në Ballkan duke lënë me qindra mijëra varre pas vetes .

Me përulësi Aurita Agushi aktore nga Kosova .