Infektuar: 1110
Shëruar: 843
Vdekur: 30
‘Muzeu im’, ekspozita e parë virutale e trashëgimisë familjare në Kosovë

‘Muzeu im’, ekspozita e parë virutale e trashëgimisë familjare në Kosovë

Kultura May 07, 2020 - 17:44

Është thuajse në finalizim përgatitja e Ministrisë së Kulturës, Rinisë dhe Sportit për Ditën Ndërkombëtare të Muzeve.

Dita e Muzeve mbahet me datë 18 maj ndërsa MKRS-ja është duke u bërë gati për një ekspozitë virtuale, përcjell “Zëri.info”.

Sipas një njoftimi për media të MKRS-së, thuhet se për shkak të gjendjes në të cilën po ndodhet vendi me virusin COVID 19, këtë vit Muzeu Kombëtar i Kosovës nuk do mund të festojë me aktivitetet që zakonisht i ka realizuar për çdo vit.

Por, aktivitetet e planifikuara për t’a shënuar këtë ditë ICOM do t’i sjellë në një formë të re në mënyrë digjitale.

"Edhe Kosova i është bashkëngjitur kësaj nisme pasi që Muzeu Kombëtar i Kosovës që disa vite me radhë e feston këtë ditë me aktivitete të shumta, dhe për gati katër vite është pjesë e ICOM-it. Edhe këtë vit, në Kosovë do të bëhen organizime për ta shënuar këtë ditë me aktivitete e ngjarje kreative që do të sillen në mënyrë digjitale, e ku bën pjesë edhe ekspozita virtuale në fjalë", thuhet në njoftimin e ministrisë.

Ministria thotë se ekspozita virtuale e cila do të organizohet nga Muzeu Kombëtar i Kosovës ka për qëllim të sjellë muzeun më afër banorëve të Republikës së Kosovës, për ta ngritur vetëdijen rreth vlerave dhe ruajtjes së trashëgimisë dhe diversitetit tonë kulturor.

Konkretisht, Muzeu im është një aktivitet/ekspozitë virtuale e organizuar për të ndihmuar bashkëpunimin në mes komunitetit dhe Muzeut, dhe ofron një qasje të re për gjithpërfshirje duke integruar në ekspozitë koleksione nga trashëgimia familjare e banoreve të Republikës së Kosovës. Qëllimi është që duke qëndruar në shtëpi të ndërtojmë një ekspozitë virtuale me punime (vizatime, piktura, dizajnime), objekte (vegla pune, enë, orendi, punime të vjetra druri, metali, guri; veshje), fotografi të dërguara në format digjital.

Dita Ndërkombëtare e Muzeve organizohet nga ICOM (International Council of Museums) që nga viti 1977 për çdo vit me 18 Maj me një temë të veçantë. Për ta shënuar këtë ditë, më shumë se 44 mijë Muze nga 138 vende të botës marrin pjesë duke zhvilluar aktivitete dhe ngjarje kreative që lidhen me temën e caktuar. Këto aktivitete kanë për objektivë ngritjen e vetëdijes te njerëzit që “Muzetë janë mjet shkëmbimi kulturor, pasurimit të kulturës dhe zhvillimit të dyanshëm, bashkëpunimit dhe paqes mes njerëzve”.

Tema e caktuar për këtë vit nga ICOM “Muzetë për Barazi: Diversitet dhe Gjithëpërfshirje” do të përdoret nga muzetë e botës si pikë e besueshme për të festuar diversitetin kulturor në mes të komuniteteve.