Artistet kosovare me shfaqje kërkojnë mbrojtjen e Teatrit të Tiranës

Artistet kosovare me shfaqje kërkojnë mbrojtjen e Teatrit të Tiranës

Kultura gusht 09, 2019 - 11:53
Lexo më shumë detaje

 

Shfaqja “Kanuni i gruas” me regji nga Arlinda Morina u shfaq për publikun në skenën e Teatrit Kombëtar të Shqipërisë. "Kanuni i gruas" u vlerësua si një shfaqje që përcjell emocion dhe është e mbështetur në lëvizje skenike, këndim dhe biseda, e performuar nga aktore profesioniste. Shfaqja në fjalë interpretohet nga tetë aktore nga Kosova, njëherësh kjo shfaqje u shfaq edhe si premierë për TKSH-në. Shfaqja “Kanuni i gruas” u shfaq në skenën e Teatrit Kombëtar në kuadër të Festivalit për Mbrojtjen e Teatrit, kurse regjisorja Morina shprehet se bashkohet nismës për mbrojtje të Teatrit Kombëtar. “Ne solidarizohemi me artistët e Shqipërisë në mbrojtje të Teatrit, tempullit të artit”, tregon ajo.

Me regji nga Arlinda Morina, asistentregjie Labinot Raci, kjo shfaqje është prezantuar dhe më parë në Kosovë. Regjisorja tregon se shfaqja është pritur me interesin e të pranishmëve, që kanë ndjekur interpretimin e tetë aktoreve. “Në Kosovë ka pasur mjaft publik kur është shfaqur. E kanë pritur me një habi, që nëpërmes një tradite kam bërë një art avangardë”, tregon regjisorja Morina.

Regjisorja tutje ka vlerësuar dhe bashkëpunimin për ta sjellë në skenë shfaqjen, sipas saj puna me “Artpolis” dhe aktoret ka qenë një përvojë e mirë. “Unë për herë të parë bëj një performancë dhe me ndihmën e aktoreve erdhi deri te finalizimi dhe një ndjeshmëri e pastër”, tha Morina.

“Kanuni i gruas” për temë ka gruan në një cikël të procesit jetësor, duke e vënë theksin te ndikimi i mjedisit në pritshmërinë e saj për jetën, nënshtrimin ndaj paragjykimeve, të vlerësimeve dhe të abuzimeve të ndryshme. Duke përcjellë mesazhe për shoqërinë tonë, kjo shfaqje teatrore sipas regjisores Morina rikujton dhe të këqijat që i bëhen gruas. “Kam menduar që përmes një performance të tregoj traditën e kanunit për gruan, prej lindjes derisa mbaron jeta e saj. Për të kaluar të keqen duhet të rikujtojmë, që të mos përsëritet. Prandaj unë si regjisore kam rikujtuar veset e këqija, që bëhen ndaj gruas nga shoqëria jonë”, pohon regjisorja Morina.

Shfaqjen për kanunin e sollën në skenën e Teatrit tetë artiste nga Kosova: Arta Lahu, Kaltrinë Zeneli, Molikë Maxhuni, Qëndresa Kajtazi, Qëndresa Loki, Rajmonda Ahmetaj, Daniela Markaj dhe Vjosa Abazi.

Disa pjesë të kanunit dhe një monolog anonim nga botimi “Me kon nuse”, janë përdorur në shfaqje. Sipas regjisores së shfaqjes Morina me rëndësi është dhe mesazhi për ndërgjegjësimin e shoqërisë sonë. “Mesazhi është që të rifillojë ndërgjegjësimi i shoqërisë, që femrën ta trajtojë si krijesë të barabartë me mashkullin”, pohon mes të tjerave regjisorja.

Qendra për art dhe komunitet “Artpolis” organizoi në muajin qershor festivalin rajonal për artiste “FemArt”, ku u prezantua dhe “Kanuni i gruas”. Motoja e festivalit këtë vit ishte “Me liri kundër marres”, duke i inkurajuar gratë të marrin pronësinë mbi jetët e tyre dhe në vendimmarrje, duke promovuar një jetë pa paragjykime e gjykime. “FemArt” edhe këtë vit solli disa performanca dhe shfaqje teatrale që do të organizuan në vende të ndryshme në Prishtinë.