Shqipëria përjashton nga TVSH-ja librat elektronikë

Kultura November 29, 2018 - 10:21

Qeveria e Shqipërisë po sheh mundësinë e një ndryshimi në ligjin “Për librin në Republikën e Shqipërisë” që përfshin përjashtimin nga Tatimi mbi Vlerën e Shtuar të atyre që sot njihen si e-librat ose libra që lexohen në platforma elektronike dhe jo në versionin tradicional letër. Draftligji i nxjerrë për konsultim bën dy shtesa të rëndësishme, shkruan sot gazeta "Zëri".

Ndryshimi i parë në Nenin 18/1 nënvizon se furnizimi i shërbimeve të shtypshkronjave, të shtëpive botuese, dhe materialet e ofruara në formën tradicionale e çdo formë tjetër elektronike të librit, pavarësisht përmbajtjes së tij, që mund të lexohet nëpërmjet pajisjeve të tjera ndihmëse, duke përfshirë edhe platformat elektronike (e-libri), përjashtohet nga Tatimi mbi Vlerën e Shtuar.

Ndryshimi i dytë i rëndësishëm po i lidhur me TVSH-në te libri sanksionohet në Nenin 49 shtohen dy pika të reja 3 dhe 4, të cilat përcaktojnë se pas miratimit të këtij ligji ka nevojë për ndërhyrje në dy ligje të tjera siç është ai për TVSH-në dhe ai për Prokurimin Publik. Zëri