I dyshuari nga Restelica ishte trajtuar në tri raste penale, dy herë me masa të detyrueshme psikiatrike
Gjykata Themelore në Prizren ka bërë të ditur se ndaj të pandehurit Ferzidin Boza nga fshati Restelicë, komuna e Dragashit, janë trajtuar gjithsej tri raste penale në Gjykatën Themelore Prizren – Dega në Dragash, gjatë viteve të fundit, transmeton Zeri.info.
Sipas njoftimit zyrtar, rasti i parë më datë 15 korrik 2022, ka përfunduar me aktgjykim dënues për veprën penale “Lëndim i lehtë trupor”. Të pandehurit i është shqiptuar dënim me burgim prej 6 muajsh, i cili është pezulluar për një periudhë verifikuese prej dy vitesh, me kusht që të mos kryejë vepër tjetër penale. Në këtë rast, gjykata i ka shqiptuar edhe masën e trajtimit të detyrueshëm psikiatrik – ambulantor në liri, në kohëzgjatje prej dy vitesh, e cila është zbatuar nga Qendra e Shëndetit Mendor në Prizren, me obligim raportimi periodik ndaj gjykatës.
Rasti i dytë, me datë 22 gusht 2022, ka të bëjë me veprën penale “Dhuna në Familje”. Edhe në këtë rast, Ferzidin Boza është dënuar me 6 muaj burgim me kusht, me periudhë verifikuese prej një viti. Po ashtu, gjykata i ka shqiptuar sërish masën e trajtimit të detyrueshëm psikiatrik në liri, e cila është zbatuar nga Qendra e Shëndetit Mendor në Prizren, deri në përmirësimin e gjendjes mendore, por jo më shumë se tre vjet, sipas dispozitave ligjore.
Ndërkaq, rasti i tretë me datë 17 tetor 2024, lidhet përsëri me veprën penale “Lëndim i lehtë trupor”. Në këtë rast, gjykata ka shqiptuar dënim me 6 muaj burgim, ku është llogaritur edhe koha e kaluar në paraburgim nga data 30 qershor 2024 deri më 25 shtator 2024. Me pëlqimin e të akuzuarit dhe mbrojtjes, dënimi me burgim është zëvendësuar me dënim me gjobë në vlerë prej 2,000 euro, nga e cila është zbritur shuma përkatëse e kohës së kaluar në paraburgim. Shuma e mbetur prej 260 euro duhet të paguhet pas plotfuqishmërisë së aktgjykimit.
Gjykata Themelore në Prizren ka njoftuar se gjatë ditës do t’i mbajë mediat të informuara për rrjedhën e mëtejme të rastit, nëse do të paraqitet kërkesë për caktimin e masës së sigurisë, si dhe për kohën e mbajtjes së seancës dëgjimore. /Zëri
