Aktakuzë ndaj dy personave, bënë thirrje për masakra ndaj hebrenjve e të krishterëve

Prokuroria Speciale ka njoftuar se ka dorëzuar aktakuzë ndaj dy personave për veprën “Nxitje e përçarjes dhe mosdurimit”.

Sipas njoftimit, të pandehurit M.M. dhe A.B. akuzohen se kanë nxitur dhe përhapur urrejtje midis grupeve fetare, sipas metodave të propagandës së ISIS-it, raporton Zeri.info.

Po ashtu, ata akuzohen se kanë bërë thirrje për masakra ndaj hebrenjve dhe krishterëve dhe këto thirrje i kanë publikuar në rrjetet e tyre sociale. Përveç kësaj, ata kanë bërë thirrje që të respektohen ligjet e “Sheriatit”.

“Sipas aktakuzës, A.B. nga vitit 2019 e deri më 22.05.2025, përmes rrjetit social Facebook, në profilin e tij me emrin ‘Ubejdullah Abu Suhejla’, ka shpërndarë materiale me përmbajtje nxitëse, përmes së cilave ka bë thirrje për t’iu bashkuar luftës për xhihad.

Prokuroria Speciale riafirmon përkushtimin e saj në ndjekjen dhe hetimin e këtyre veprave penale, të cilat cenojnë rëndë vlerat demokratike dhe bashkëjetesën mes grupeve etnike dhe fetare që jetojnë në Republikën e Kosovës”, thuhet në njoftim. /Zëri