Kjo është gjendja shëndetësore e të plagosurit në Gjilan

Pacienti 41-vjeçar, i plagosur një ditë më parë në Gjilan me armë zjarri, është në gjendje stabile pas ndërhyrjes kirurgjikale në Klinikën e Kirurgjisë Abdominale në QKUK.

Drejtori i Kirurgjisë Abdominale, Enver Fekaj, tha për Ekonominë Online se pacienti ka pësuar lëndime të shumta, duke përfshirë edhe dëmtim serioz në abdomen.

“Bëhet fjalë për një pacient 41-vjeçar, Bujar Hoxha nëse nuk gaboj është emri i pacientit. Ai ka pasur lëndime në kokë, disa gërvishtje në dy duart, dy ekstremitetet e sipërme. Lëndimin më serioz e ka pasur në abdomen. Lëndimet në kokë, për këto lëndime janë kompetentë neurokirurgët, janë thirrur në konsultim dhe ata kanë bërë përpunim plage, por gjendja e vetëdijes nuk ka qenë e komprometuar dhe s’ka pasur nevojë për ndërhyrje urgjente nga ana e kirurgut, por për një përcjellje të vazhdueshme”, tha Fekaj.

Sipas tij, dëmtimi në abdomen është shkaktuar nga veprimi i armës së zjarrit dhe ka prekur zorrën e hollë.

“I ka pasur pesë përpunime, është bërë shkurtimi i zorrës, ngjitja e zorrës. Aktualisht e evidentova edhe personalisht, pacienti është stabil, është i vetëdijshëm, por për shkak të intervenimit kirurgjik që ka pasur normalisht që kërkon një përcjellje dinamike. Për momentin është stabil”, tha ai.

Pacienti fillimisht është pranuar në Qendrën Emergjente të QKUK-së, pas plagosjes në Gjilan, dhe më pas është transferuar për trajtim në Kirurgjinë Abdominale.

Një ditë më parë në Gjilan u vranë tre persona, ndërsa të dyshuarit për vrasje ende janë në arrati.