Rastet e shpeshta për vrasje e krime ndikojnë në shëndetin mendor të shoqërisë

Ditëve të fundit vendi është tronditur nga dy vrasje dhe një vetëvrasje që kanë ndodhur në rajonin e Vushtrrisë.

Këto vrasje janë komentuar nga sociologë e psikolog, të cilët kanë treguar ndikimin e tyre në shoqërinë tonë, shkruan Zeri.info.

Psikologu Petrit Thaçi ka thënë në emisionin “Destinim” në Radio Prishtina se rastet e shpeshta të vrasjeve dhe krimeve të ngjashme si këto në ditët e fundit ndikojnë edhe në shëndetin mendor të shoqërisë në përgjithësi, edhe te personat që nuk janë përfshirë direkt në raste të tilla.

“Realisht dëgjimi i shpeshtë dhe i përsëritur i rasteve të tilla do të ndikoj te qytetarët që të krijojë fillimisht, doza të frikës dhe anktheve që një situatë e tillë mund t’i atakojë ata në çfarëdo rrethane. Mund t’i bëj më paranojakë, mund t’i rrisë frustrimet dhe të penalizojë potencialet e tyre për t'u zhvilluar natyrshëm, mund të heqë ndjeshmërinë dhe të normalizojë fenomenin e vrasjes”, tha Thaçi, duke shtuar se sistemi ynë psikologjik mund të adabtohet dhe pas disa viteve mund të duket si normale

Po ashtu edhe sociologu Labinot Kunushevci tha se qeshtjet e sigurisë duhet të shndërrohen në urgjencë kombëtare e shtetërore.

“Vrasjet e ditëve të fundit janë shqetësuese dhe alarmuese, pra çështja e sigurisë me u shndërrua në urgjencë kombëtare dhe shtetërore sepse bëhet fjalë për të ardhmen e fëmijëve tanë që çdo herë po ndihen të pasigurt”, tha Kunushevci në “Destinim” në Radio Prishtina, transmeton Zeri.info.

Ai shtoi se shteti duhet të investojë më shumë te gjeneratat e reja në aspektin psikologjik, duke përmendur inteligjencën emocionale, si një faktor të rëndësishëm.

“Kjo tregon që gjeneratat nuk po jenë të afta të përdorin inteligjencën emocionale, është një e met e shtetit që nuk po investon në këtë drejtim. Potencial e për dhunë kanë shumë njerëz, por ai potencial duhet mu kontrollua edhe me u kthye në energji pozitive”, tha Kunushevci. /Zëri