Seanca ndaj logopedit Iljasa Fazliu mbahet në spital, s’paraqitet në Gjykatë për arsye shëndetësore
Në Gjykatën Themelore të Gjilanit mëngjesin e sotëm do të duhej të mbahej seanca për caktimin e masës së sigurisë ndaj logopedit që u arrestua nën dyshimet për abuzim me vajzën që është me autizëm, të cilën familja e kishte dërguar në seancë tek ai.
Për shkak të gjendjes së mjekut, seanca është duke u mbajtur në Spitalin e Gjilanit. Këtë e konfirmoi për Sinjalin drejtori i Spitalit të Përgjithshëm në Gjilan.
Ky rast u zbulua pasi mjeku paraprakisht ishte sulmuar nga babai i fëmijës dhe një familjar i tij, të cilët ia zunë pritën gjatë ditës së djeshme dhe e rrahën në një lokal.
Edhe ndaj tyre, Prokuroria Themelore në Gjilan ka kërkuar caktimin e masës së paraburgimit, me arsyetimin e se është e vetmja masë që mundëson zhvillimin normal të procedurës, duke pasur parasysh rrethanat dhe veprat për të cilat po dyshohen të dyja palët.
Në kërkesën e paraburgimit ndaj Isak Shalës (babai i vajzës) dhe Rilind Vllasaliut, thuhet se të njëjtit me dashje kanë sulmuar mjekun brenda një lokali në Gjilan, duke e akuzuar për trajtim të pandërgjegjshëm mjekësor. Për pasojë, mjeku i dyshuar ka pësuar lëndime trupore. /sinjali