Në kërkim për trafik droge me Habilajt, arrestohet ish-shefi i policisë së Dhërmiut

Sokol Bode, ish-shefi i Policisë së Dhërmiut është arrestuar në Berat.

Ish-shefi i Policisë së Dhërmiut, Sokol Bode u dënua në prill, me 8 vjet heqje lirie për trafik narkotikësh.

Sokol Bode u akuzua nga ish-Prokuroria e Krimeve të Rënda dhe më pas nga SPAK për implikim në trafikun e narkotikëve të kryer nga organizata kriminale e drejtuar prej vëllezërve Moisi dhe Florian Habilaj.

Gjyqtarja dënoi të pandehurit Sokol Bode me 12 vjet heqje lirie, ku në aplikim të gjykimit të shkurtuar u vendos dënimi përfundimtar me 8 vjet burg.

Pjesë e të njëjtit hetim ishte edhe ish-shefi kundër krimit të organizuar në drejtorinë e Policisë së Vlorës Gjergj Kohilla është dënuar me 8 vite burg për trafik droge dhe grup të strukturuar kriminal.

SPAK kishte kërkuar 12 vite burg për Kohillën, por për shkak të gjykimit të shkurtuar atij iu ul një e treta e dënimit.

Anëtarët e organizatës së drejtuar nga vëllezërit Habilaj, kushërinj të ish-ministrit të Brendshëm Saimir Tahiri, u ndaluan në tetor të vitit 2017 nga autoritetet italiane dhe u dënuan në qershor të 2019-ës.

Ata u arrestuan nga policia Italiane teksa po tentonin të trafikonin një sasi të konsiderueshme lënde narkotike nga Shqipëria drejt Italisë.

Bazuar në hetimet e drejtësisë italiane dhe asaj shqiptare përfundoi në burg edhe ish-ministri Tahiri, pasi u dënua me vendim të formës së prerë për “shpërdorim detyre” më 24 shkurt. Ndërkohë akuzat e SPAK ndaj Tahirit për trafik narkotikësh dhe grup të strukturuar kriminal u rrëzuan si të paprovuara. /euronews