Kishte rrëmbyer dy fëmijët e tij, arrestohet kosovari më i kërkuar në Austri

Kishte rrëmbyer dy fëmijët e tij, arrestohet kosovari më i kërkuar në Austri

Kronika July 27, 2021 - 08:39

Për vite të tëra Sh. M. ishte një nga personat më të kërkuar nga Zyra Federale e Policisë Kriminale në Austri.

Pas një mosmarrëveshjeje me bashkëshorten se kujt do t’i takojnë fëmijët për kujdestari, shqiptari rrëmbeu fëmijët e tij, vajzën (atëkohë trevjeçare) M. dhe djalin pesëvjeçar I. nga Grieskirchen dhe bashkë me ta iku përmes Shqipërisë për në Kosovë. Gjurmët u zhdukën. Edhe kërkimet e INTERPOL-it atje (v.j. në Kosovë) ishin të pasuksesshme, shkruan oe24.at, përcjell albinfo.at.

Por hetuesit e LKA-së të Austrisë së Epërme nuk u dorëzuan. Në vitin 2019 ata rihapën sërish çështjen. Me ndihmën edhe të Ambasadës Austriake në Kosovë mblodhën të dhëna për vendndodhjen e babait dhe të fëmijëve.

Gjithçka funksionoi. Në korrik Sh.M. u arrestua në Prizren. Ai tani është në paraburgim dhe pritet që gjatë ditëve të ardhshme të transferohet për në Austri. Për shkak të rrëmbimit, pas kthimit në Austri, ai pritet të përballet me deri në tre vjet burgim, transmeton albinfo.at.

Të dy fëmijët janë nën kujdesin e autoriteteve austriake në Kosovë. Atyre u janë dhënë pasaporta emergjente dhe pritet që shumë shpejt të kthehen në Austrinë e Epërme. Ende nuk është bërë e ditur se kur do të mundë ta takojnë nënën e tyre, A.N.

Dhjetë vjet më parë A.N. kishte fituar të drejtën nga gjykata përkatëse e Grieskirchen për kujdesin ndaj fëmijëve të saj.