OEK-u lëshon certifikatën e parë “Made in Kosova”, e njohur ndërkombëtarisht

Oda Ekonomike e Kosovës (OEK) ka lëshuar sot certifikatën e parë të origjinës “Made in Kosova”, sipas standardeve ndërkombëtare, pas pranimit të saj në Rrjetin Ndërkombëtar të Dhomave të Tregtisë (ICC) për lëshimin e Certifikatave të Origjinës.

Certifikata e parë iu lëshua kompanisë FLUIDI Group, në një ceremoni ku dokumenti iu dorëzua përfaqësuesve të kompanisë nga kryetari i OEK-ut, Lulzim Rafuna, dhe zëvendësministri i Ministrisë së Industrisë, Ndërmarrësisë dhe Tregtisë, Jeton Mehmeti.

Sipas OEK-ut, ky zhvillim përbën një hap të rëndësishëm për bizneset kosovare, pasi certifikatat e origjinës “Made in Kosova”, të lëshuara sipas standardeve ndërkombëtare, synojnë të rrisin besueshmërinë e dokumentacionit tregtar dhe të lehtësojnë procedurat e eksportit në tregjet ndërkombëtare.

Për kompanitë kosovare, certifikimi pritet të mundësojë një proces më të standardizuar dhe më të besueshëm për dëshmimin e origjinës së produkteve, duke kontribuuar në forcimin e pozitës së tyre në tregtinë ndërkombëtare dhe zgjerimin e eksporteve.

OEK vlerëson se përfshirja në rrjetin ndërkombëtar të ICC-së dhe lëshimi i certifikatave sipas këtyre standardeve paraqet avancim në shërbimet që u ofrohen bizneseve kosovare dhe në mbështetjen e tyre për qasje më të lehtë në tregjet globale. /Zëri