Mes vonesash, ndërmarrja “për bateritë” afër rekrutimit të Bordit
Pas zhbllokimit të Programit Kompakt me Korporatën e Sfidës së Mijëvjeçarit – MCC, në fund të Korrikut, ka lëvizje për funksionalizimin e Korporatës për Ruajtjen e Energjisë – KRE.
Jo-zyrtarisht, TV Dukagjini merr vesh që veçse janë kryer procedurat kryesore të për rekrutimin e anëtarëve të Bordit të Drejtorëve të ndërmarrjes për bateritë, por se për hapin zyrtar duhet konfirmimi nga MCC-ja dhe miratimi nga Qeveria.
Në këto rrethana vendimi zyrtar për emërimin e Bordit të ndërmarrjes – që u themelua në mars 2024 – pritet të merret pas formimit të Qeverisë së re.
Megjithatë, as Ministria e Ekonomisë e as zyra e agjencisë amerikane në Prishtinë nuk u përgjigjën në pyetjet e televizionit lidhur me këtë temë.
Po ashtu, ky medium mëson se muaj më parë është hartuar draft-statuti i Korporatës për Ruajtjen e Energjisë.
Megjithëse zhvillim pozitiv, procesi i rekrutimit të Bordit si hap vendimtar për funksionalizimin e ndërmarrjes ishte paraparë të ndodhte para fundit të 2024-s.
Këtë e kishte konfirmuar vetë Ministria e Ekonomisë.
Fakti se Kosova do të hyjë në vitin 2026 pa e funksionalizuar këtë ndërmarrje, sipas Kushtrim Ahmetit nga Dhoma e Tregtisë dhe Industrisë tregon qasjen jo-serioze të institucioneve vendore në raport me projektet e mëdha.
“Vonesat e shumta dhe konsideroj që shpeshherë të paarsyeshme për një kohë kaq të gjatë. Nëse ka pasur Bordi të bëhet në 2024-n kur qeveria ishte funksionale pse nuk është krye deri në atë kohë? Pse duhet me pritë tash 2026-n?… Nëse është projekt shumë i rëndësishëm, siç po flasim për projektin e baterive, ky do të duhej të kishte punime duke u bërë, jo të presim procedura burokratike kur po bëhet Bordi e kur s’po bëhet”, ka deklaruar Kushtrim Ahmeti, Drejtor në Dhomën e Tregtisë dhe Industrisë së Kosovës.
Në kuadër të zbatimit të marrëveshjes me MCC-në, nga e cila Kosova fitoi grantin në vlerë 202 milionë dollarë, më 13 mars 2024, Qeveria miratoi vendimin për themelimin e Korporatës për Ruajtjen e Energjisë.
Me këtë projekt pesëvjeçar, Kosova synon të blejë dhe instalojë bateri me kapacitet deri në 340 megavatë orë, me qëllim ruajtjen e energjisë, balancimin e sistemit dhe integrimin e burimeve të ripërtrishme në të.
Nga fillimi i vitit, kur Donald Trumpi mori zyrtarisht pushtetin në SHBA e deri në fund të Korrikut ky projekt kishte mbetur pezull si pasojë e kufizimeve buxhetore për agjencitë amerikane.
