Produktet nga Kosova po marrin më shumë treg në Gjermani
Oda Ekonomike Gjermano-Kosovare (OEGJK) ka publikuar të dhënat e përpunuara nga raportet e Doganës së Kosovës për periudhat 2023 dhe 2024, duke theksuar rritjen e dukshme në shkëmbimet tregtare.
Sipas të dhënave të grumbulluara gjatë vitit kalendarik 2024, nga Kosova drejt Gjermanisë vlera e eksportit mbërrin shifrën prej 92.7 milionë eurove, rritje prej 7.9% krahasuar me vlerat e nxjerra nga viti 2023.
Ndërkaq, vlera e importit nga Gjermania në Kosovë rrumbullakon 897 milionë euro, duke shënuar rritje prej 19.4% në krahasim me vitin 2023.
Ndër kategoritë që shënuan vlerat më të larta në eksport në vitin 2024 përfshijnë:
Plastika dhe artikujt prej tyre;
Mobilieritë dhe kategori të tyre;
Artikuj prej gizës dhe çelikut.
Ndër kategoritë që shënuan vlerat më të larta në import në vitin 2024 përfshijnë:
Mjetet e transportit të ndryshëm nga nagonët e hekurudhës ose tramvajit, pjesët dhe plotësuesit e tyre;
Reaktorët nuklearë, boilerat, makineri dhe pajisjet mekanike, si dhe pjesët e tyre; Plastika dhe artikujt prej tyre.
Këto të dhëna theksojnë rritjen e dukshme në shkëmbimet tregtare Kosovë-Gjermani, duke dëshmuar forcimin e mëtutjeshëm të marrëdhënieve ekonomike dhe bilaterale mes Kosovës dhe Gjermanisë. /Zëri
