Hapet aplikimi për subvencione në bujqësi, ministri Peci tregon vlerën për produkte
Ministri i Bujqësisë, Faton Peci, ka njoftuar se është hapur aplikimi për Programin për Pagesa Direkte – Subvencione 2024.
Përmes një postimi në Facebook, Peci ka thënë se do të ofrojnë përkrahje konkrete, transparente, kontroll e meritokraci për të gjithë fermerët.
Në këtë thirrje mund të aplikojnë të gjithë qytetarët që synojnë të përfitojnë nga subvencionet për 28 nënsektorë dhe kultura bujqësore.
“Përkrahje për grurin nga 464 deri në 564 euro për hektar. Përkrahje për misrin 329 €/ha. Përkrahje për elbin 304 €/ha. Përkrahje për thekrën 304 €/ha. Përkrahje për tërshërën 304 €/ ha. Një hektar luledielli do të subvencionohet me 454 euro. Rritje për vreshtarët në 1104 euro për çdo hektar. Pemishtet ekzistuese do të subvencionohen me 504 €/ha. Rritje e përkrahjes për sasinë e dorëzuar/shitur të frutave të mjedrës në 0.20 €/kg”, shkroi ministri.
Sipas tij, risi tjetër është rritja e përkrahjes për kulturat perimtare në fushë të hapur dhe prioritizimi i atyre që është rritur kërkesa dhe të cilat kanë shënuar rritje në eksport.
“Speci – Varieteti Kurtovka nga 500 €/ha në 654 €/ha. Speci – Varieteti Somborka nga 500 €/ha në 654 €/ha. Domate nga 500 €/ha në 654 €/ha. Tranguj nga 500 €/ha në 654 €/ha. Qepa nga 500 €/ha në 654 €/ha. Hudhra nga 500 €/ha në 654 €/ha. Fasulja monokulture nga 500 €/ha në 754 €/ha. Patatja nga 500 €/ha në 654€/ha. Vazhdon përkrahja për perimet e tjera në fushë të hapur me 554 €/ha, ndërsa për perimet në serra do të subvencionohen me 904 €/ha”.
“Te pagesa direkte për bimët mjekësore dhe aromatike, si dhe bimët mjaltëdhënëse do të subvencionohen me 504 euro për hektarë. Rritje e përkrahjes për sipërfaqet që janë të certifikuara në 304 €/ha për bujqësi organike. Subvencionimi për lopë qumështore nga 90 € për krerë. Rritje e përkrahjes për kafshët e imta nga 25 € ne 30 € për krerë, konkretisht për dhitë. Dyfishim i përkrahjes për kafshët e mëdha nga 90 € në 180 € për krerë, konkretisht për buallica. Dosat në riprodhim do të subvencionohen 25 €/krerë. Vazhdon subvencionimi për zogjtë për majmëri ose broilerët me 0.20 euro për zog”, bëri të ditur Peci.
Për më shumë informata, lidhur me procedurat e aplikimit për pagesa direkte, kriteret e vlerësimit fermerët mund të informohen në detaje në web faqen e MBPZHR-së, https://www.mbpzhr-ks.net/sq/subvencione dhe në web faqen e AZHB-së, https://azhb-rks.net/sq/subvencione, si dhe në Drejtoritë Komunale për Bujqësi. /Zëri
