Sivjet Ferizaj do t’i ketë 100 mijë euro më pak për subvencione në bujqësi

Rreth 400 mijë euro Drejtoria e Bujqësisë në Ferizaj ka paraparë në kategorinë e subvencioneve për fermerët në Ferizaj. Por, krahasuar me vitin e kaluar, sivjet do të jenë 100 mijë euro më pak. E kjo sipas komunës, vjen nga shkurtesat buxhetore që janë bërë në Ministrinë e Financave.

 “Normalisht që fermerët nuk do të furnizohen me pleh artificial azotik por Ministria e Bujqësisë e ka si kategori të investimeve këtë tek fermerët. Dhe unë po besojë që nuk do të vërehet mungesa e investimeve të drejtorisë sonë tek fermerët sepse të gjitha projektet e parapara që të implementohen do të implementohen edhe këtë vit”, tha për RTK, Burim Bajrami - Drejtor i Bujqësisë në Ferizaj.

Këtë zvogëlim të subvencioneve për bujqësi, opozita  e sheh si mosmenaxhim të mirë të mjeteve nga ekzekutivi.

“LVV e ka kundërshtuar zvogëlimin për 100 mijë euro për subvencione për komunën e Ferizajt për arsye se vitin e kaluar kanë qenë mbi 500 mijë euro e sivjet i kemi vetëm 400 mijë euro. Pra për LVV është e pa pranueshme për shkak se keq menaxhimi për këtë buxhet nga ana e ekzekutivit po i shkakton dëme në shumë sektor e siç është edhe sektori njëri prej më të rëndësishmit në komunën tonë edhe i bujqësisë”, tha Brahim Osmani, asamblist i LVV në KK të Ferizajt

Fermerët thonë se subvencioni i tyre është shumë i domosdoshëm dhe shpresojnë që të gjenden forma të ndryshme të përkrahjes.

 “Ne jemi të varur shumë prej subvencioneve dhe grandeve që i jep edhe komuna edhe Qeveria e Kosovës. Nëse këto nuk janë të mjaftueshme ose nder prehen ose nuk vazhdon me ritëm edhe në vitet e ardhshme atëherë është shumë serioze për fermerët jo vetëm të komunës së Ferizajt për të gjithë Kosovës”, tha Alberton Sahiti, fermer

Në Ferizaj këtë viti janë paraparë mbi 1 milion euro investime kapitale në bujqësi.