ATK: Gastronomia dhe hoteleria paguajnë 117% më shumë tatim

ATK: Gastronomia dhe hoteleria paguajnë 117% më shumë tatim

Ekonomia March 29, 2023 - 13:25

Monitorimi i fokusuar i hotelerisë/gastronomisë dhe funksioneve që lidhen me to, si këngëtarëve, stilistëve etj., ka nisur përmes projektit specifik për përmbushje tatimore në vitin e kaluar.

Administrata Tatimore e Kosovës (ATK), përmes një njoftimi, thotë se ky projekt ka dhënë rezultatet e veta në trajtimin e sektorëve të lartcekur, të cilët në sistemin e ATK-së kanë paraqitur nivel të konsiderueshëm të rrezikut.

“Thirrjet e shpeshta nga ATK për të përmbushur detyrimet dhe puna në terren, kanë rezultuar që statistikat nga ky sektorë të jenë në një nivel të kënaqshëm, duke filluar nga qarkullimi i deklaruar me 24.24% ose 64 milionë euro, pagesa 117.08% ose 10 milion euro dhe numri punëtorëve 14.45% ose 2,820 punëtorë më shumë se viti i kaluar. Pastaj, duke vazhduar me gjetjet nga terreni, si qarkullimi shtesë nga vizitat me dallim enorm prej 321.95% më shumë se vitin e kaluar.

Dihet që në sektorin e gastronomisë dhe hotelerisë, përveç atyre që u përmendën, si dukuri e cila mbetet ndër faktorët kyç të informalitetit janë edhe punëtorët e padeklaruar, e kjo është dëshmuar edhe nga puna e inspektorëve, të cilët për 2022 kanë formalizuar 111.84% punëtorë më shumë se vitin e kaluar. Ajo çka vlen të potencohet është se ky sektor prin me statistika sa i përket fiskalizimit, por mbetet sfidë lëshimi i kuponëve fiskalë”, thuhet në njoftim.

Tutje thuhet se projekti për përmbushje tatimore në hoteleri dhe gastronomi, si dhe zinxhirin e tyre bashkëpunues do të vazhdojë të implementohet, me qëllim të formalizimit plotë të aktiviteteve.

“Administrata Tatimore e Kosovës vazhdon me kërkesën për tatimpaguesit, që të përmbushin obligimet e tyre tatimore, si një e mirë e gjithmbarshme”, thotë ATK-ja. /Zëri