Konglomerati turk blen “Ferronikelin”, zotohet se do ta bëjë një prej kompanive më të mira në Evropë

Grupi YILDIRIM, një konglomerat ndërkombëtar me bazë në Turqi, ka nënshkruar marrëveshje për blerjen e kompanisë “NewCo Ferronikeli”, një prej prodhuesve më të mëdhenj të ferronikelit në Evropë, e cila gjendet në Drenas.

Përmes një komunikate për media, është bërë e ditur se të gjitha aksionet e “NewCo Ferronikel”-it zotëroheshin nga grupi BALFIN, ndërsa tani ato i ka blerë grupi YILDIRIM.

Konglomerati turk është zotuar se të gjitha masat e nevojshme janë ndërmarrë për një tranzicion të qetë, transmeton Zeri.info.

“YILDIRIM ka një interesim të veçantë që të angazhohet në “NewCo Ferronikeli”, meqë ka edhe një plan konkret biznesi për të rritur aktivitetin në fushën e metaleve dhe minierave, për ndërtimin e një prej kompanive më të mira në Evropë për prodhimin e nikelit. Plani i propozuar i biznesit do ta shndërrojë ‘NewCo Ferronikel’-in në njërën prej fabrikave më të vlefshme të grupit YILDIRIM”.

“Me këtë rast, dega e grupit YILDIRIM, YILDAMIN Holding zgjeron gamën e prodhimit të ferroaliazheve. Kompania, tashmë, renditet e katërta në botë në biznesin e Kromit, e dyta në botë për prodhimin e ferrokromit me karbon të lartë (HC FeCR) dhe është lidere në fushën e prodhimit të kromit me kualitet të lartë dhe sektorin minerar”, thuhet në komunikatë

Kompania që ka blerë “Ferronikelin” tashmë zotëron edhe fabrika të prodhimit të Koksit Metalurgjik me Fosfor të Ulët në Kolumbi, si dhe një fabrikë metalurgjike të Ferrovanadiumit dhe Ferromolibdenit në SHBA.

YILMADEN Holding punëson mbi 7,500 punonjës në tetë vende: Turqi, Kosovë, Suedi, Kazakistan, Rusi, Shqipëri, Kolumbi dhe SHBA. Kompania eksporton produktet e saj në më shumë se 100 vende të botës, përmes më shumë se 20 qendrave të shpërndarjes, të vendosura gjithandej botës.

Me selinë qendrore në Stamboll të Turqisë, Grupi YILDIRIM është një prej grupeve të angazhuara në sektorët e industrisë dhe infrastrukturës, që ka rritjen më të shpejtë në nivel global.

“Grupi industrial botëror ka një prodhimtari të diversifikuar mirë, duke qenë aktiv në nëntë sektorë globalisht: kryesisht në sektorin e metaleve dhe minierave, operimin dhe menaxhimin e porteve, fertlizuesve dhe kemikaleve, energjisë, transportit dhe logjistikës, investimeve financiare dhe pronave private. YILDIRIM operon në 54 shtete në 5 kontinente, duke punësuar më shumë se 18,000 njerëz anembanë botës”, thuhet më tej në komunikatë. /Zëri