“KEDS-i e KESCO nuk rrisin çmime, as nuk ndryshojnë tarifa”

“KEDS-i e KESCO nuk rrisin çmime, as nuk ndryshojnë tarifa”

Ekonomia January 26, 2022 - 15:52

Pas aksionit të Partisë Socialdemokrate te Qeveria e Kosovës për propozimin për shtrenjtim të rrymës dhe debatit në Kuvend, KEDS-i ka dalë me një komunikatë për media, duke bërë të ditur se ata nuk janë përgjegjës për rritjen e çmimit rreth energjisë elektrike dhe as për strukturën tarifore.

Nga kjo kompani thuhet se ata kanë të drejtë që të bëjnë propozime në aplikimin tarifor, por që në fund vendimet i merr Zyra e Rregullatorit për Energji.

“Në aplikimin tarifor, të gjitha Palët e Interesit, duke na përfshirë edhe neve, kemi të drejtë të dërgojmë propozime tona. Por, është ZRRE-ja ajo që merr vendimet. Deri tash, 95 për qind e propozimeve tona nuk janë marrë parasysh. Pra, heqja e bllok-tarifës në vitin 2017 ishte dhe mbetet përgjegjësi ekskluzive e ZRRE-së. Ne nuk jemi politikëbërës, por jemi vetëm kompani operative”, thuhet mes të tjerash në komunikatë.

Komunikata e plotë:

KEDS-i dhe KESCO sqarojnë që nuk rrisin çmime dhe as nuk janë përgjegjës për strukturën tarifore. Kjo strukturë ndërtohet pas aplikimit për Të Hyrat Maksimale të Lejuara (MAR). Në aplikimin tarifor, të gjitha Palët e Interesit, duke na përfshirë edhe neve, kemi të drejtë të dërgojmë propozime tona. Por, është ZRRE ajo që merr vendimet. Deri tash, 95 për qind e propozimeve tona nuk janë marrë parasysh. Pra, heqja e bllok tarifës në vitin 2017 ishte dhe mbetet përgjegjësi ekskluzive e ZRRE-së. Ne nuk jemi politikëbërës, por jemi vetëm kompani operative.

Asnjë shtet nuk kemi parë që e ka drejtuar gishtin nga kompania distributive për krizën. Kompania distributive shpërndanë energjinë elektrike që e ka në dispozicion. Nëse ka prodhim të mjaftueshëm dhe nëse kostoja e importit mbulohet, sistemi nuk afektohet. Në Kosovë ndodhi e kundërta: Kostoja e importit nuk u mbulua për muaj të tërë, ndërsa kur energjia elektrike nevojitej më së shumti, u reduktua ndjeshëm prodhimi vendor. As çmimet e importit as prodhimi vendor nuk janë në dorën tonë.

Kur kostot nuk mbulohen, vjen deri te krisja e hallkave të zinxhirit elektroenergjetik. Borxhi i akumuluar ndaj KOSTT dhe KEK ka ardhur pikërisht nga mosmbulimi i kostove të importit për një kohë të gjatë. Nëse ky borxh do t’u paguhej kompanive, kufizimet e energjisë elektrike do të fillonin qysh nga muaji shtator.

Ne kemi përdorur të gjitha mjetet dhe kemi paralajmëruar qysh në gusht që çmimet e importit po rriteshin ndjeshëm dhe duhej vepruar. Askush nuk ndërmori asgjë. Kishim aplikuar edhe për shqyrtim të jashtëzakonshëm tarifor në mënyrë që të mos afektohej sistemi dhe konsumatorët të vazhdonin të merrnin shërbimet adekuate, por sërish nuk u ndërmor asgjë. ZRRE e arsyetoi këtë duke thënë: Çmimet e energjisë elektrike në berza janë spekulative dhe do të bien!

Ndërkohë, në praktikë ndodhi e kundërta, ato u rritën tutje. Ne vazhduam ta bartim barrën deri sa na u shterën të gjitha resurset financiare dhe mundësitë. Sikur politikëbërësit të vepronin në kohë dhe të merrnin parasysh kërkesat dhe paralajmërimet tona, ne nuk do të vinim në këtë situatë. Ajo do të përballohej shumë më lehtë.

Ne, kemi bërë në vazhdimësi aq sa kemi pasur në dorë. Fitimet dhe humbjet e KEDS/KESCO janë të rregulluara dhe nëse tejkalohet, atëherë kthehet vitin tjetër në sistem me 8 për qind kamatë. Pra, gjithçka është formulë matematikore! Ndryshe, të dy kompanitë e kanë përmbyllur vitin e fundit me humbje.

Ndërkohë, krejt çka është fituar deri tash, ka shkuar për të mirën e qytetarëve të Kosovës. Kemi investuar për tetë vjet të operimeve tona rreth 190 milionë euro në rrjetin elektrik të vendit, që e gjetëm në gjendje të rëndë. Ai tashmë është përmirësuar ndjeshëm. Si rezultat i operimeve dhe investimeve efiçiente ka shumë vjet që çmimet e energjisë elektrike nuk kanë ndryshuar. Të njëjtën kohë, pronarët kanë dhënë nga xhepat e tyre deri tash mbi 60 milionë euro për humbjet jopërformuese.

Në këto rrethana, KEDS/KESCO kërkojnë nga të gjitha palët politikëbërëse që të bëjnë më të mirën e mundshme për funksionimin e sistemit, pasi nga vendimet dhe politikat adekuate, përfiton direkt konsumatori kosovar. Në rrethana krize, kur secili e kryen punën me përkushtim dhe përgjegjësi, atëherë ajo përballohet shumë më lehtë, thuhet në njoftimin për media. /Zëri