Murati tregon se ku i merr Qeveria 75 milionë eurot që do t’i japë për rrymë
Foto:Laura Hasani

Murati tregon se ku i merr Qeveria 75 milionë eurot që do t’i japë për rrymë

Ekonomia January 26, 2022 - 12:11

Ministri i Financave, Hekuran Murati, ka thënë se Qeveria nuk do ta ketë problem t’i ndajë 75 milionë euro për subvencionimin e energjisë elektrike, të parapara në raportin konsultativ të Zyrës së Rregullatorit për Energji, ku është propozuar shtrenjtimi i rrymës.

Murati, në një konferencë për media pas mbledhjes së Qeverisë, tha se janë përkujdesur që të ketë buxhet të mjaftueshëm për situata të jashtëzakonshme si kjo me krizën energjetike.

“Ne si Qeveri jemi përkujdesur që gjatë hartimit të buxhetit për vitin 2022 t’i kemi hapësirat e nevojshme, pra fleksibilitetin e nevojshëm duke marrë parasysh pandeminë. Çdoherë kemi paraparë që mund të ndodhë një situatë e jashtëzakonshme”, tha ai.

“Sa u përket ndarjeve buxhetore, nuk besoj që do të kemi problem, megjithëse kjo normalisht që është një barrë shtesë edhe për buxhetin”, shtoi Murati.

Ai u pyet edhe për mosshtrenjtimin e rrymës për katër komunat në veri të vendit.

“Ne jemi duke punuar që probleme të tilla të cilat i kemi trashëguar dhe nuk kanë gjetur zgjidhje për 20 vitet e kaluara, do të mundohemi t’i zgjidhim në afatin sa më të shkurtër”, tha Murati. /EO