Shtrenjtimi i rrymës i pashmangshëm, faturën e paguan shteti ose konsumatorët

Zyra e Rregullatorit të Energjisë ka paralajmëruar se kriza energjetike ka gjasa të zgjasë deri në muajin prill të 2022-ës. Është paralajmëruar edhe se faturat do të jenë më të shtrenjta.

Në Komisionin Parlamentar për Ekonomi, në shqyrtimin e Planit e Performancës së ZRRE-së për vitin 2022, kryesuesi i Bordit të kësaj zyre, Ymer Fejzullahu, ka thënë se ndër planet e institucionit janë: rritja e konkurrencës dhe integrimi i tregut. E ka konsideruar sfiduese periudhën e ardhshme, raporton EO-ja.

Për faturimin e konsumatorëve në veri të vendit, Fejzullahu ka thënë se operatori serb “Elektroserver” do të licencohet për këtë çështje, por “kur të krijohen kushtet për operim”.

Teksa ka folur për liberalizimin e tregut, ai ka thënë se kjo nuk mund të bëhet pa funksionalizimin e Fondit të konsumatorëve në nevojë.

Për paralajmërimet se do të ketë shtrenjtim të çmimit të rrymës, Fejzullahu ka thënë se sipas vlerësimeve ndërkombëtare, çmimi s’do të bjerë deri në prill dhe nëse nuk mbulohet nga buxheti i Kosovës, ajo do të mbulohet nga konsumatorët.

“Nëse nuk mbulohet nga buxheti i Kosovës, atëherë kjo duhet të mbulohet nga konsumatorët, për shkak se rreth 1 milion euro është kostoja e importit, kosto e papërballueshme për neve dhe konsumatorët”, ka deklaruar ai.

Si pasojë e ngritjes së çmimit të rrymës në botë dhe mbingarkesës në vend gjatë dimrit, ditëve të fundit në vend ka pasur reduktime të energjisë elektrike.