12 zyrtarë të Qeverisë rrezikojnë të gjobitën pasi nuk e deklaruan pasurinë në AKK

12 zyrtarë të Qeverisë rrezikojnë të gjobitën pasi nuk e deklaruan pasurinë në AKK

Ekonomia April 28, 2021 - 16:31

Janë 12 zyrtarë të Qeverisë së Kosovës dhe 13 të tjerë nga komunat të cilët rrezikojnë të gjobiten pasi nuk kanë deklaruar pasurinë në Agjencinë Kundër Korrupsionit (AKK).

Bazuar në Ligjin për Deklarimin, Prejardhjen dhe Kontrollonin e Pasurisë së Zyrtarëve të Lartë Publik, zyrtarët që se deklarojnë pasurinë mund të dënohen me gjobë prej 1000 deri në 2500 euro. Krahas dënimeve e gjobë, zyrtarëve mund t’iu ndalohet ushtrimi i funksionit deri në një vit.

Ndryshe, zyrtarët kanë pasur afat që ta deklarojnë pasurinë deri më 31 mars.

Procesi i deklarimit të pasurisë, është realizuar nëpërmjet pranimit të formularëve të deklarimit të pasurisë në mënyrë elektronike.

Nga 4 mijë e 892 zyrtarë të lartë publik, deklarimin e kanë bërë 4 mijë e 783.

“Nga numri i përgjithshëm prej 4892 të zyrtarëve të lartë publik që kanë pasur për obligim ta deklarojnë pasurinë, 4783 zyrtarë të lartë publikë kanë bërë deklarimin e pasurisë brenda afatit të rregullt ligjor, 56 zyrtarë të lartë publikë kanë deklaruar pasurinë pas afatit të rregullt ligjor, 28 nga zyrtarët nuk e kanë deklaruar pasurinë me arsye, ose kanë deklaruar pas afatit, me arsyet e cekura ndërsa 25 prej tyre nuk e kanë deklaruar pasurinë deri më tani”, thuhet në njoftimin e AKK’së.

AKK-ja ka bërë me dije se përveç deklarimit të rregullt vjetor, ka pranuar një numër të konsiderueshëm të formularëve të deklarimit të pasurisë me rastin e marrjes së detyrës zyrtare si dhe me rastin e përfundimit të detyrës zyrtareve.

“Përveç deklarimit të rregullt vjetor të pasurisë, me ndryshimet që kanë ndodhur në institucionet publike, këtë vit, Agjencia kundër Korrupsionit, ka pranuar një numër të konsiderueshëm të formularëve të deklarimit të pasurisë me rastin e marrjes së detyrës zyrtare si dhe me rastin e përfundimit të detyrës zyrtareve”, thuhet tutje në njoftimin e AKK-së. /Zëri