ATK-ja zhvillon aplikacionin ku bizneset e prekura nga pandemia mund të aplikojnë për subvencionime
Foto ilustruese

ATK-ja zhvillon aplikacionin ku bizneset e prekura nga pandemia mund të aplikojnë për subvencionime

Ekonomia April 28, 2021 - 09:17

Administrata Tatimore e Kosovës njofton se ka zhvilluar aplikacionin dhe tashmë bizneset mund të parashtrojnë kërkesat e tyre për të përfituar subvencione për rënien e të hyrave për shkak të kufizimeve të vendosura nga Qeveria.

“Duke u bazuar në vendimin e Qeverisë së Republikës së Kosovës Nr. 08/08, datë 21.04.2021, lidhur me subvencionimin e shoqërive tregtare (bizneseve), përkatësisht për subvencionimin e pagës së punëtorëve dhe/ose subvencionimin e pagesës së qirasë për bizneset që kanë pësuar rënie të ndjeshme në të hyra për shkak të kufizimeve të vendosura sipas Vendimit Nr. 01/05, të datës 05.04.2021, të Qeverisë së Republikës së Kosovës, Administrata Tatimore e Kosovës ka zhvilluar aplikacionin dhe tashmë punëdhënësit dhe qiramarrësit mund të parashtrojnë kërkesat e tyre për të përfituar nga këto masa”, thuhet në njoftimin e ATK-së, transmeton Zeri.info.

ATK-ja thekson se këto subvencione janë për sektorin e gastronomisë, qendrat tregtare të tipit të mbyllur, fitneset e palestrat dhe linjat aktive të licencuara për transport ndërurban të udhëtarëve.

“Për subvencionim të pagës së punëtorëve mund të aplikojë punëdhënësi, nëse është: Biznes me aktivitet të vetëm gastronominë, biznes me nënsektor gastronominë, vetëm për stafin e angazhuar në gastronomi, biznes që ushtron aktivitetin në qendra tregtare të tipit të mbyllur, biznes me aktivitet fitnese dhe palestra; dhe biznes me linja aktive të licencuara për transport ndërurban të udhëtarëve. Ndërsa, për subvencionim të qirasë mund të aplikojë qiramarrësi, nëse është: Biznes me aktivitet të vetëm gastronominë; dhe biznes që ushtron aktivitetin në qendra tregtare të tipit të mbyllur”, thekson ATK-ja përmes këtij njoftimi.

Administrata Tatimore bën të ditur se 11 maji është data e fundit e dorëzimit të kërkesave të bizneseve.

“Personat të cilët do të përfitojnë sipas këtyre masave kërkesat e tyre do t’i dërgojnë përmes sistemit elektronik EDI, më së largu deri më 11 maj 2021. Për subvencionim të pagës së punëtorëve punëdhënësi, përmes sistemit elektronik EDI, duhet të plotësojë formularin ‘Kërkesë për subvencionim të Pagave dhe Qirasë’ (vetëm pjesën e parë për Paga), të bashkëngjisë listën e të punësuarve, ashtu siç është dizajnuar nga ATK-ja. Formulari gjendet në sistemin EDI, në linkun Shërbimet – Kërkesë për subvencionim të Pagave dhe Qirasë, ndërsa lista mund të shkarkohet në të njëjtin link, në butonin Kërkesë e re – Shkarko mostrën. Për subvencionim të Qirasë, Qiramarrësi, përmes sistemit elektronik EDI duhet të plotësojë formularin ‘Kërkesë për subvencionim të Pagave dhe Qirasë’ (vetëm pjesën e dytë për qira), si dhe të bashkëngjisë listën e qiradhënëseve, ashtu siç është dizajnuar nga ATK-ja. Po ashtu qiramarrësi duhet të ngarkojë çdo kontratë të qirasë në mes të qiradhënësit dhe qiramarrësit, e cila duhet të jetë e lidhur para datës 1 shkurt 2021. Formulari gjendet në Sistemin EDI në linkun Shërbimet – Kërkesë për subvencionim të Pagave dhe Qirasë, ndërsa lista mund të shkarkohet në të njëjtin link, në butonin Kërkesë e re – Shkarko mostrën, si dhe në butonin Ngarko dëshmitë/kontratat duhet bashkangjitur dëshmitë dhe kontratat me qiradhënësit. Përmes formularit të lartcekur, punëdhënësi dhe qiramarrësi, duke evidentuar dëshmitë ofron edhe sqarimin se si ka ndikuar në biznesin e tij, Vendimi Nr. 01/05, i datës 05.04.2021, i Qeverisë së Republikës së Kosovës. Udhëzuesin për aplikim për subvencionim të pagave të punëtorëve dhe qirasë e gjeni në dritaren ku edhe bëhet kërkesa, si dhe në uebfaqe të ATK-së www.atk-ks.org, në linkun Multimedia – Manuale & Prezantime”, përfundohet në njoftim. /Zëri